Սպանությանը նախորդել է վիճաբանությունը․ նոր մանրամասներ

Irakanum.am —  ն  արդեն տեղեկացրել էր, որ ԱԺ նախկին պատգամավոր Կարո Կարապետյանի վրա կրակել է ԱԺ նախկին պատգամավոր Հարություն Ղարագյոզյանը, հանրությանը հայտնի Կարամելի Հարութը։ Մեր ունեցած հավաստի տեղեկություններով երկու նախկին գործընկերների մեջ գույքային վեճ է եղել։ Վեճը հարթելու համար նրանք հանդիպել են Նորք-Մարաշում գտնվող «Այգիներ» ռեստորանային համալիրում։Վեճը չի հարթվել։ Նախկին պատգամավորները ռեստորանային համալիրում վիճաբանել են, ինչից հետո տեղի է ունեցել սպանությունը։ Հիշեցնենք, որ  հոկտեմբերի 6-ին, ժամը 22-ն անց 40-ի սահմաններում ոստիկանության Կենտրոնականի բաժին ահազանգ է ստացվել, որ Նորք Մարաշի Արմենակյան փողոցում գտնվող հացատներից մեկում կրակոցներ են։ Րոպեներ անց ոստիկանության Կենտրոնական բաժին ահազանգեր են հնչել Երեւանի տարբեր բժշկական կենտրոններից։ Հայտնում էին, որ իրենց մոտ բուժօգնության են տեղափոխվել հրազենային վիրավորումով երկու տղամարդ։ Հոսպիտալացված տղամարդկանցից մեկը մահացել է։ Դեպքի վայրում հայտնաբերվել են պարկուճներ եւ ատրճանակ։ Ձեռնարկված օպերատիվ-հետախուզական միջոցառումների եւ քննչական գործողությունների արդյունքում պարզվել է հանցագործությունը կատարելու մեջ կասկածվողի ինքնությունը։ Ձեռնարկվում են միջոցառումներ նրան հայտնաբերելու ուղղությամբ։ ՔԿ-ի տվյալներով վիրավորվածը Սարգիս Ավագյանն է, որին վիրահատում են։