Նո՞ր իմացաք, որ ֆրանկոֆոնիա է լինելու. Հայկ Բաբուխանյանը՝ փոխարտգործնախարարին

Այսօր Ազգային ժողովի արտահերթ նիստում հիմնական զեկուցող, արտաքին գործերի փոխնախարար Ռուբեն Ռուբինյանը նշեց, որ կառավարությունն աշխատանքային օրերի փոփոխություն իրավասու է անել միայն «Տոների և հիշատակման օրերի մասին» օրենքում ընդգրկված օրերի մասով։ ՀՀԿ խմբակցության պատգամավոր Հայկ Բաբուխանյանը հետաքրքրվեց, թե ինչո՛վ է պայմանավորված հարցի հրատապությունը. «Մեր Ազգային ժողովի կանոնակարգ» օրենքով նախատեսվում է, որ հարցը մտնում է քննարկումից 5 օր առաջ, խախտումը ինչպե՞ս կբացատրեք»: Հարցին նախ պատասխանեց փոխնախարարը, ասելով, որ այն պայմանավորված է Երևանում անցկացվելիք ֆրանկոֆոնիայի գագաթնաժողովի միջոցառումներով, որոնք տեղի են ունենալու հոկտեմբերի 11-12-ը: Այնուհետև հարցին միջամտեց ԱԺ նախագահ Արա Բաբլոյանը և տեղեկացրեց. «Թույլ տվեք պարզաբանել, որովհետև այդ հարցը վերաբերում է ԱԺ նախագահին, այլ ոչ թե զեկուցողին: Նման պարագայում կանոնակարգը տալիս է այն իրավունքը, որպեսզի վարչապետը, եթե հրատապ պետք է բերի, բանավոր համաձայնեցնում է Ազգային ժողովի նախագահի հետ, ինչն ինքն արել է մեկ օր առաջ, կառավարության նիստից»: Բաբուխանյանը արձագանքելով պարզաբանմանը նկատեց, որ ֆրանկոֆոնիայի գագաթնաժողովի  մասին հայտնի էր դեռ անցյածլ տարվա նոյեմբերից. «Ես հրատապությունը լավ չհասկացա, դուք նո՞ր իմացաք, որ ֆրանկոֆոնիա պետք է լինի, և հարցն այսպես արտակարգ բերեցիք, թե կան այլ պատճառաբանություններ»: Փոխարտգործնախարարն էլ պատասխանեց. «Անշուշտ ո՛չ, պարո՛ն Բաբուխանյան, նոր չիմացանք, որ ֆրանկոֆոնիա է լինելու, սակայն մտադրությունը ֆրանկոֆոնիայի հետ կապված՝ տեղափոխել աշխատանքային օրերը, կատարվել է վերջերս, և, հետևաբար, հիմա ենք ներկայացնում այս նախագիծը»: