Ով եւ ինչու է սրում իրավիճակը

Քաղաքական դաշտը լիակատար քաոս է հիշեցնում:Երեկ վարչապետը հայտարարեց, թե կարծես համաձայնություն է կայացել դեկտեմբերին արտահերթ ընտրություն անցկացնելու հարցում: Ազգային ժողովում Փաշինյանը պատգամավորների հետ ուշ գիշերվա հանդիպումից հետո հավաքված բազմությանը տեղեկացրեց, թե երեք ուժերից ոչ մեկը թեկնածու չի առաջադրի իր հրաժարականից հետո եւ ԱԺ-ն կլուծարվի ու կգնանք արտահերթ ընտրությունների: Բայց լույսը բացվեց եւ Ազգային ժողովի երեք խմբակցությունները մեկը մյուսին հերթ չտալով հերքեցին վարչապետին, ասացին, որ այդպիսի համաձայնություն չի կայացվել, որ իրենք նման խոստում չեն տվել, խոսքը գնացել է մայիս-հունիս ամիսներին անցկացվելիք ընտրությունների մասին, այդ ժամանակ, իսկապես, նրանք թեկնածու չեն առաջադրի, իսկ դրանից առաջ, դեռ հարց է, որը քննարկում է պահանջում:Եվ ահա, ԱԺ-կառավարություն հարցուպատասխանի ժամանակ Նիկոլ Փաշինյանը պատասխանելով իր կուսակից Ալեն Սիմոնյանի հարցին հայտարարեց ճիշտ հակառակը, որ եղել է նման խոստում: Ասաց, որ խոսել է դեկտեմբերին ընտրությունները կազմակերպելու մասին.«Ասել եմ մեխանիզմի մասին և «Հանրապետական», «Ծառուկյան դաշինք» խմբակցությունների ներկայացուցիչները ասել են, որ վարչապետի պաշտոնը թափուր մնալու դեպքում իրենք չեն պատրաստվում վարչապետի թեկնածու առաջադրել», ասաց Փաշինյանը ավելի ուշ հավելելով, որ ՀՅԴ-ն էլ է նույն հավաստիացումը տվել: Փաշինյանի խոսքով՝ սա եղել է այն համատեքստում, որ խմբակցությունները հստակ արձանագրել են այն քաղաքական իրավիճակը, որ այսօր առկա է երկրում։ «Կարծում եմ՝ խելամտությունը ստիպում է, որ 2-րդ մայիսի մեկ անելու գայթակղությանը տրվելը անտեղի ու ավելորդ կլինի», - ասաց ՀՀ վարչապետը։ Նիկոլ Փաշինյանը նշեց, որ, իր կարծիքով, մայիսի մեկին ինքն ազդարարեց քաղաքական որոշ ուժերի ինքնասպանություն գործելու փաստի մասին։«Կարող եմ ասել, որ, ցավալիորեն, ինքնասպանությունների շարքը շարունակվում է», - ընդգծեց վարչապետը։ Հիմա հարց է ծագում՝ ով եւ ինչու է ստում: Արդյոք օրենսդիրները երեկ ահաբեկվել են խորհրդարանի շենքի առջեւ հավաքված բազմությունից եւ պահի ազդեցության տակ նման զիջման են գնացել, բայց երբ վտանգն անցել է, վերադարձել են ելման դիրքի, թե Փաշինյանն է միտումնավոր խեղաթյուրում իրականությունը՝ էլ ավելի գրգռելով իրավիճակը եւ սրելով ժողովրդական տրամադրությունները: Մինչ այս պահը դեռ ոչ մի կողմ իրեղեն ապացույց չի ներկայացնում եւ ինտրիգը մնում է չբացահայտված: Նշենք, որ քիչ առաջ հայտարարությամբ հանդես եկավ նաեւ ՀՀԿ խմբակցություն՝ շեշտելով, որ ՀՀԿ խմբակցությունը որեւէ համաձայնություն կամ խոստում վարչապետին չի տվել։ <<ՀՀԿ խմբակցությունը շարունակում է համարել, որ պետք է կյանքի կոչվի կառավարության ծրագրում եւ վարչապետի նախկին հայտարարություններում հնչեցված ծրագիրը՝ բարելավելով ընտրական օրենսդրությունը եւ ողջամիտ ժամկետ տալով քաղաքական ուժերին առաջիկա խորհրդարանական ընտրություններին նախապատրաստվելու համար, ինչն ենթադրում է արտահերթ խորհրդարանական ընտրությունների անցկացումը 2019 թվականի մայիս-հունիս ամիսներին>>։ Անի Սահակյան