Փաշինյան - Ալիև պայմանավորվածությունից հետո հայ-ադրբեջանական սահմանին հրադադարի խախտման դեպքերը նվազել են. Դավիթ Տոնոյան

Նիկոլ Փաշինյան-Իլհամ Ալիև կարճատև հանդիպումից և պայմանավորվածությունից հետո հայ-ադրբեջանական սահմանին հրադադարի խախտման դեպքերը նվազել են, իսկ այսօր գրանցվել է ամենացածր վիճակագրությունը։ Այս մասին այսօր կառավարության նիստից հետո լրագրողների հետ զրույցում ասաց ՀՀ պաշտպանության նախարար Դավիթ Տոնոյանը։ «Մենք ստացել ենք հրահանգ՝ չթիրախավորելու և պահպանելու հրադադարի բոլոր պայմանավորվածությունները։ Եվ դա մենք իրականացնում ենք»,- ասաց նախարարը։ Լրագրողների հարցին՝ ինչ կանխատեսում ունի ներքաղաքական իրադարձություններն ինչ ազդեցություն կարող են ունենալ սահմանային իրավիճակի վրա, Դավիթ Տոնոյանը պատասխանեց. «Բայց ի՞նչ կանխատեսում կարող եմ ես ունենալ։ Չեմ կարծում, ամեն դեպքում մենք այս պահին հրադադարը պահպանում ենք, և, եթե իրավիճակի փոփոխություն լինի քաղաքական իրավիճակով պայմանավորված՝ Զինված ուժերն իրենց առաջադրանքը կկատարեն»։