«Լուսավոր Հայաստան»-ն աջակցելու է արտահերթ խորհրդարանական ընտրությունների հասնելու ցանկացած սցենարի
«Լուսավոր Հայաստան» կուսակցությունն աջակցելու է արտահերթ խորհրդարանական ընտրությունների հասնելու բոլոր սցենարներին: Ազգային ժողովում լրագրողների հետ զրույցում այս մասին ասաց ԱԺ «Ելք» խմբակցության պատգամավոր Էդմոն Մարուքյանը: «Կսկսվի բանակցություն, կլինի կոնկրետ առաջարկ՝ կքննարկենք, առայժմ ոչ մի առաջարկ չկա: Արտահերթ ընտրությունների մասին դեռ վարչապետի ընտրությունից առաջ ենք ասել, որ անհրաժետ է: Հիմա, թե ինչ սցենարով կբերվի ցրելու գործընթացը, կբերեն, մենք կհասկանանք»,- ընդգծեց Մարուքյանը: Անդրադառնալով դիտարկմանը, թե խոսակցություններ կան արտահերթ խորհրդարանական ընտրությունները մինչև ընթացիկ տարվա վերջ անցկացնելու մասին՝ Էդմոն Մարուքյանն ընդգծեց՝ եթե առաջարկ արվի արտահերթ խորհրդարանական ընտրությունները մինչև տարեվերջ անցկացնելու մասին, պետք է երաշխավորվեն նաև մնացած բոլոր հանգամանքները: «Եթե երաշխավորվում են, այո, մենք որևէ խնդիր չենք տեսնում»,- նշեց Մարուքյանը: Բացի այդ, Մարուքյանը բացառել է միակուսակցական խորհրդարան ունենալու հնարավորությունը, քանի որ թեև երկրում որոշակի էյֆորիկ տրամադրություններ կան, սակայն այդ հարցը կարգավորված է Սահմանադրությամբ:
Հետևեք մեզ Viber-ում
