Կառավարության պաշտոնյայի խոստովանությունը՝ անգործության են մատնված

Կառավարության գլխավոր գործավար Նարե Գրիգորյանի ազատման պատմությունը վերջին օրերին լրատվադաշտի ամենաքննարկվող թեմաներից է, որն այնքան ջուր քաշեց, որ ջրի երես հանեց նոր իշխանությունների որոշ բացեր։ Նախ հիշեցնենք, որ սեպտեմբերի 24-ին Նարե Գրիգորյանը ֆեյսբուքի իր էջում «Այսօրվանից գործազուրկ եմ – Նիկոլի ականջը կանչի» վերտառությամբ գրառում էր կատարել, որով տեղեկացրել էր, որ վարչապետի աշխատակազմի գործերի կառավարիչ Վահան Պապիկյանն իրեն ստիպել է աշխատանքից ազատվելու դիմում գրել: Գրիգորյանի խոսքով` իրեն աշխատանքից ազատելու պատճառն այն էր, որ ինքը, ունենալով անչափահաս երեխա, հրաժարվել էր երեկոյան արտաժամյա աշխատանք կատարել և այդ մասին տեղյակ էր պահել աշխատակազմի ղեկավար Էդուարդ Աղաջանյանին: Երկու օր անց գործազուրկ տիկնոջը օգնության ձեռք մեկնեց վարչապետի տիկինը՝ Սննա Հակոբյանը՝ առաջարկելով նրան աշխատանք իր «Հայկական ժամանակ» օրաթերթում։ Թվում էր, թե ամեն ինչ հանդարտվել է, սակայն այսօր պարզաբանմամբ հանդես եկավ նաեւ Էդուարդ Աղաջանյանը՝ բացահայտ խոստովանելով, որ իր ենթական՝ Վահան Պապիկյանը եւ ընդհանրապես կառավարությունը անգործության է մատնված։ Աղաջանյանը նախ երկար-բարակ ներկայացնում է իր և Նարեի, ինչպես նաեւ իր եւ Վահան Պապիկյանի զրույցը ու ներկայացնում արդյունքը, որը բնականաբար, տիկնոջ օգտին չի խոսում․«Եվ ի՞նչ պատկեր ունենք այստեղ Նարեի պարագայում: Պարզվում է, որ սույն տիկինը վերջին մեկ ամսում ամենաուշը լքել է Կառավարության շենքը ժամը 18:28-ին: Ավելին, պարզվում է, որ նա պարբերաբար նաև ուշացել է գործից՝ ներկայանալով, օրինակ, ժամը 13:00-ին» անմեղորեն խոստովանում է Աղաջանյանը։ Ստացվում է, որ պետական աշխատողը պարբերաբար ուշանում է աշխատանքից, իսկ կառավարության գործերի կառավարիչն աչք է փակում այդ փաստի վրա, սա, իհարկե, այս պատմության ամենաաննշան դրվագն է, սակայն խոսում է այս իշխանությունների անփութության եւ անգործության մասին։ Հետեւաբար կամ Աղաջանյանը պետք է ամեն ինչ անի ազատվելու գործերի կառավարչից, կամ էլ Փաշինյանը՝ Աղաջանյանից՝ կառավարության աշխատանքները այսպես թերացումներով կազմակերպելու համար։ Տիկնոջ աշխատանքից ազատման պատմությունը նաեւ ջրի երես հանեց այն փաստը, որ Փաշինյանի իշխանությունում արդեն թեւեր են ձեւավորվել, որոնք ակտիվորեն պայքարում են մեկը մյուսի դեմ։ Ըստ որոշ տեղեկությունների՝ Վահան Պապիկյանը Աղաջանյանի մտերիմ ընկերն է, դրա համար էլ Աղաջանյանն անձամբ պարզաբանումներ ներկայացրեց, մինչդեռ Պապիկյանից առաջ նույն պաշտոնում Գևորգ Աճեմյանի շուրջ բարձրացված աղմուկն ավելի մեծ էր, սակայն Աղաջանյանը պաշտպանության որեւէ փորձ չարեց։ Հիշեցնենք, որ Աճեմյանի աշխատանքից հեռացման հիմնական պատճառը դարձավ նրա կողմից պաշտոնեական դիրքի չարաշահումը, ըստ տեղեկությունների՝ նա սպառնալիքներ էր հնչեցրել «Աշտարակ կաթ»-ի սեփականատիրոջ նկատմամբ, ասելով, որ այն կվերադարձնի նախկին սեփականատիրոջը։ Ավելին, տեղեկություններ կան, որ Աճեմյանը վայելում էր Փաշինյանի համակրանքը, սակայն դա չխոչընդոտեց, որպեսզի Աղաջանյանն ու առաջին փոխվարչապետ Արարատ Միզոյանը Աճեմյանի շուրջ բարձրացված աղմուկը ավելի հնչեղ դարձնեն, սեփական ֆեյքերի բանակով տարածեն այդ հրապարակումները, որն ի վերջո հանգեցրեց Աճեմյանի հեռացմանը։ Կառավարության մեր աղբյուրը նաեւ պատահական չի համարում, որ Նարե Գրիգորյանին աշխատանքի առաջարկ է արել Աննա Հակոբյանը։ Անի Սահակյան