Փաշինյանի նյույորքյան ֆուրորն ու ինտրիգային ուղերձը

Հասան Ռոհանին Նիկոլ Փաշինյանին հրավիրեց Իրան Նիկոլ Փաշինյանը վերջին 2 օրերին երկկողմ հանդիպումներ է ունեցել Նյու Յորքում ՄԱԿ-ի կենտրոնակայանում: Ուշագրավ հանդիպումներից կարելի է առանձնացնել նախ ՄԱԿ-ի գլխավոր քարտուղարի հետ՝ երեկ նրա հանդիպումները և այդ հանդիպումից հետո քարտուղարի 2 ելույթները, որոնցում նա դրական ներկայացրեց Հայաստանում տեղի ունեցած թավշյա հեղափոխությունը: Փաշինյանն այսօր հանդիպել է Իրանի նախագահ Հասան Ռոհանիի հետ: Նրանք քննարկել են հայ-իրանական հարաբերությունների օրակարգային տարբեր հարցեր, կարևորել են տնտեսական համագործակցության զարգացումը և նշել, որ այն զգալիորեն զիջում է երկկողմ քաղաքական հարաբերությունների մակարդակին, անհրաժեշտ են համարել գործուն քայլերի ձեռնարկումը` առևտրատնտեսական կապերի խթանման, առկա ներուժի իրացման նպատակով: «Նիկոլ Փաշինյանն ընդգծել է, որ հայ-իրանական հարաբերություններն ունեն առանձնահատուկ բնույթ և պետք է դրանք շարունակեն զարգանալ բարեկամական ամուր կապերի հիմքի վրա: Իր հերթին, Հասան Ռոհանին նշել է, որ երկու երկրների միջև առկա է վստահության բարձր մակարդակ: Իրանի նախագահի խոսքով` հայ համայնքն իր երկրում ունի կարևոր դերակատարություն և մեծ հարգանք է վայելում իրանցիների շրջանում: Խոսելով տնտեսական փոխգործակցության մասին` Հասան Ռոհանին համոզմունք է հայտնել, որ Եվրասիական տնտեսական միության հետ ստորագրված ազատ առևտրի գոտու ձևավորմանը միտված համաձայնագիրը ևս հնարավորություն կտա ավելի խորացնել հայ-իրանական տնտեսական գործակցությունը»: Փաշինյանն ու Ռոհանին անդրադարձել են տարբեր, այդ թվում` Էներգետիկայի, ճանապարհաշինության ոլորտներում համագործակցությանը, լոգիստիկ պայմանների բարելավմանը վերաբերող հարցերի: Հասան Ռոհանին վարչապետ Փաշինյանին հրավիրել է Իրան և համոզմունք հայտնել, որ, այցը հնարավորություն կընձեռի առավել ընդգրկուն քննարկելու երկկողմ համագործակցությունն ընդլայնելու ուղիները: Իրանի նկատմամբ Միացյալ Նահանգների կոշտ քաղաքականության ֆոնին Փաշինյանը ցույց է տվել, որ Հայաստանի հարևանի հետ հարաբերությունները չպետք է տուժեն: Հայաստանը կարող է ակնկալել ԵՄ-ի հետևողական օժանդակությունը Հաջորդ ուշագրավ հանդիպումը ՄԱԿ-ի կենտրոնակայանում՝ Նիկոլ Փաշինյանի ու Յոհաննես Հանի միջև է տեղի ունեցել, որի ընթացքում նրանք քննարկել են Հայաստան-ԵՄ հարաբերությունների հետագա զարգացմանը, փոխգործակցության ընդլայնմանն ուղղված տարբեր հարցեր, անդրադարձել Համապարփակ և ընդլայնված համագործակցության համաձայնագրի կյանքի կոչմանը միտված հետագա քայլերին: Փաշինյանը նշել է, որ Հայաստանի կառավարությունը հետամուտ է երկրի ժողովրդավարական զարգացման վերընթաց ուղուն, օրենքի գերակայության ապահովմանը, մարդու իրավունքների պաշտպանությանը և մրցակցային ու բարենպաստ գործարար միջավայրի ամրապնդմանը: Նա կարևորել է ԵՄ համընդգրկուն աջակցությունը Հայաստանում տեղի ունեցող ժողովրդավարական բարեփոխումներին: Նիկոլ Փաշինյանն՝ անդրադառնալով Երևանի ավագանու արտահերթ ընտրություններին, նշել է, որ ձայների ավելի քան 80 տոկոսը քվեարկել է «Իմ քայլ»-ը դաշինքի օգտին, ինչը նշանակում է նաև հասարակությունը կողմ է քվեարկել արտահերթ խորհրդարանական ընտրությունների անցկացման օգտին: Յոհաննես Հանը նշել է, որ Եվրամիությունը հետևողականորեն շարունակելու է Հայաստանի հետ փոխգործակցության խթանմանն ուղղված ծրագրերն ու միջոցառումները, Հայաստան-ԵՄ համապարփակ և ընդլայնված համագործակցության համաձայնագրով նախատեսված ծրագրերի շրջանակում նպաստելով մեր երկրում ժողովրդավարության հետագա ամրապնդմանը, օժանդակելով օրենքի գերակայության և մարդու իրավունքների պաշտպանությանը, դատական համակարգի զարգացմանն ուղղված բարեփոխումների իրականացմանը: Յոհաննես Հանն ընդգծել է, որ Հայաստանը կարող է ակնկալել ԵՄ-ի հետևողակ ան օժանդակությունը` ըստ ՀՀ կառավարության առաջնահերթությունների նախաձեռնած արմատական բարեփոխումների: Այսպես, Փաշինյանը ԵՄ բարձրաստիճան պաշտոնյայի հետ ուղղակի անցում է կատարել Երևանի քաղաքապետի ընտրությունից դեպի խորհրդարանական ընտրություններ անցկացումը, ինչը վկայում է, որ նա օտարերկրյա գործընկերների հետ իր առաջիկա հանդիպումներում և փորձելու ստանալ նրանց աջակցությունն այդ հարցում: Հայաստանի միջազգային պարտավորությունները ենթակա չեն վերանայման Ինչ վերաբերում է Գլխավոր ասամբլեայի 73-րդ նստաշրջանում Փաշինյանի ելույթին, ապա նա շեշտադրել է ժողովրդական հեղափոխության արդյունքում՝ «Հայկական թավշյա հեղափոխության» առավելությունները, այն ներկայացնելով որպես «ավտորիտար իշխանության նկատմամբ տարած հաղթանակ»: «Իրապես ազատ, արդար և մրցակցային ընտրություններ անցկացնելու համար կարևոր քննություն էին Երևանի ավագանու ընտրությունները, որոնք տեղի ունեցան Նյու Յորք մեկնելուցս անմիջապես առաջ: Այն, որ Հայաստանի անկախությունից ի վեր առաջին անգամ բոլոր թեկնածուները շնորհավորեցին հաղթող թեկնածուին, խոսում է Հայաստանում միանգամայն նոր քաղաքական մշակույթի հաստատման մասին: Այդ նույն ոգով մենք պատրաստվում ենք արտահերթ խորհրդարանական ընտրությունների: Ազատ, արդար և թափանցիկ ընտրությունները պետք է դառնան և կդառնան Հայաստանում անշրջելի իրականություն, որը կհանգեցնի ուժեղ ու կենսունակ ժողովրդավարական ինստիտուտների և հակակշիռների գործուն համակարգի կայացմանը: Մեր քաղաքացիների իրավունքների պաշտպանությունը, խոսքի, խղճի և հավաքների ազատությունն ապահովելը մեր օրակարգի առանցքային կետերից մեկն է: Այսուհետ ընտրական գործընթացը կեղծելու և քաղաքացիների վստահությունը չարաշահելու ու խարխլելու հնարավորություն չի լինի: Ցանկանում եմ շեշտել, որ Հայաստանում ստեղծված իրավիճակը սոսկ կառավարության կամ իշխող կուսակցության փոփոխություն չէ: Ստեղծվում է նոր քաղաքական և կառավարման համակարգ, որը մենք կոչում ենք ժողովրդի ուղղակի, անմիջական իշխանություն և կառավարում: Այս համակարգն ինստիտուցիոնալ հիմքերի վրա դնելու համար մենք մտադիր ենք երաշխավորել ժողովրդի կամարտահայտությունը ոչ միայն ընտրությունների, այլև տեղական և ազգային հանրաքվեների միջոցով, որպեսզի մարդիկ ներգրավվեն որոշումների կայացման գործընթացում: Ինքս լինելով նախկին քաղաքական բանտարկյալ՝ գիտեմ, թե որքան թանկ է խնդիրները բարձրաձայնելու և սեփական ապագան որոշելու հնարավորությունը»: Փաշինյանը շեշտել է, որ իր թիմը ստանձնելով պատասխանատվություն, ունի հստակ տեսլական և հզոր քաղաքական կամք` իրականացնելու հիմնարար բարեփոխումներ՝ ուղղված կոռուպցիայի վերացմանը, թափանցիկ, հաշվետու և արդյունավետ կառավարմանը, մարդու իրավունքների և օրենքի գերակայության, դատական համակարգի անկախության ապահովմանը, ինչպես նաև խթանելու տնտեսական աճն ազատ և մրցակցային գործարար միջավայրի ու ներդրումների համար նպաստավոր մթնոլորտի միջոցով: Գալով տարածաշրջանային հարցերին, նա նախ շեշտել է, որ Հայաստանի արտաքին քաղաքականության շարունակականությունը վկայում է այն մասին, որ Հայաստանը կանխատեսելի և հուսալի գործընկեր է, և Հայաստանի միջազգային պարտավորությունները ենթակա չեն վերանայման, և Հայաստանը պատրաստ է կառուցողական երկխոսության և համագործակցության բոլոր գործընկերների հետ: «Մենք մտադիր չենք զարգացնել մեր հարաբերությունները մեկ գործընկերոջ հետ՝ մյուսի հաշվին: Մենք կարևորում ենք բազմակողմանիության դերը գլոբալ և տարածաշրջանային մակարդակներում... Մենք գիտակցում ենք, որ մեկ երկրի անվտանգությունը սերտորեն առնչվում է մյուս երկրների անվտանգության հետ, և որ գլոբալ խաղաղությունը պահանջում է համաձայնեցված գործողություններ»: Ուշագրավ է, որ Փաշինյանը չի ցանկացել անդրադառնալ Հայաստանի՝ շրջափակման մեջ լինելու, Հայաստանի երկու հարևան երկրի կողմից վարվող թշնամական վերաբերմունքի մասին: Նա թերևս, չի ցանկացել Հայաստանի հետագա զարգացման հնարավորությունն ուղղակիորեն կապել ապաշրջափակման հետ: Ու այս համատեքստում նա բաց է թողել նաև Հայաստան-Թուրքիա հարաբերությունների թեման: Թամար Բագրատունի