Հրազդանի քաղաքապետի թեկնածուներից 2-ը հետ են վերցրել փաստաթղթերը

Այսօր ավարտվեց ապրիլի 17-ին տեղի ունենալիք ՏԻՄ ընտրություններում թեկնածուների գրանցման ժամկետը: Մարտի 30-ից մեկնարկում է քարոզարշավը: Իսկ մինչ այդ թեկնածուները իրենց եկամուտների մասին հայտարարագիր կներկայացնեն Ընտրատարածքային ընտրական հանձնաժողով: ԿԸՀ կայքից տեղեկանում ենք, որ Հրազդանի քաղաքապետի պաշտոնի համար առաջադրված 5 թեկնածուներից 2-ին ԸԸՀ-ն չի գրանցել: Իրենց փաստաթղթերը ԸԸՀ-ից հետ են վերցրել անկուսակցական Վաղարշակ Պողոսյանն ու ՀՀԿ-ական Ռաֆայել Գրիգորյանը: Այսպիսով, Հրազդանում մրցակցությունն ընթանալու է ՀՀԿ-ական գործող քաղաքապետ Արամ Դանիելյանի, «Քաղաքացիական պայմանագիր» կուսակցության վարչության անդամ Սասուն Միքայելյանի եւ «Հայկական վերածնունդից» Արթուր Միսակյանի միջեւ: Թալինում առաջադրված 4 թեկնածուներից մեկի գրանցումն է ԸԸՀ-ն մերժել. խոսքը անկուսակցական Գեւորգ Գրիգորյանի մասին է: Այստեղ կպայքարեն գործող քաղաքապետ Սարգիս Արամյանը, Հայկական վերածնունդից Գուրգեն Գրիգորյանը, ՀՅԴ-ից Տիգրան Հարությունյանը: Սպիտակ քաղաքում առաջադրված 4 թեկնածուներից 2-ի գրանցումը մերժվել է. ԸԸՀ-ն գրանցել է միայն գործող համայնքապետ Գագիկ Սահակյանի ու Լոռու փոխմարզպետ Վանիկ Ասատրյանի թեկնածությունները: Իրավիճակը հետաքրքիր է նաեւ գյուղերում: Արմավիրի մարզիԱռատաշեն համայնքում, օրինակ, բոլոր 5 առաջադրվածներն էլ գրանցվել են՝ այդ թվում գյուղի միջնակարգ դպրոցի պահակ Արտակ Ղազարյանը, ով ի դեպ, ՀՀԿ-ից է: Ընդհանրապես այս համայնքում առաջադրված 5 թեկնածուներից 4-ը ՀՀԿ-ական են, որոնցից ոչ մեկին կուսակցությունը չի սատարում: armtimes.com