«Ջուրը չտեսած բոբիկանալ» պե՞տք էր

Հայաստանի արտգործնախարար Զոհրաբ Մնացականյանն այսօր կառավարությունում լրագրողների հետ ճեպազրույցում հաստատել է, որ Հայաստանի վարչապետ Նիկոլ Փաշինյանի առաջիկա ԱՄՆ այցի ժամանակ Ամերիկայի Միացյալ Նահանգների նախագահ Դոնալդ Թրամփի հետ հանդիպում չի կայանա: Ըստ նրա՝ հանդիպումը պահանջում է ժամանակ, այդ ուղղությամբ աշխատանքները շարունակում են և հարցը պետք է հասնի իր հանգուցալուծմանը: «Ներկայումս մենք չենք կարող նախատեսել, որ այսպես հապճեպ հանդիպում կկանայա»,- ասել է Զոհրաբ Մնացականյանը: Հարցին՝ այսինքն՝ հանդիպում չի՞ լինելու, նախարարը պատասխանեց. «Մենք հիմա չենք սպասում»: Այսինքն, ամիսներ առաջ Հայաստանի կառավարությունից տեղեկատվական արտահոսքն ընդամենը կազմակերպված էր՝ Փաշինյան-Թրամփ հանդիպման ֆոն ստեղծելու համար: Մինչդեռ դեռ այն ժամանակ էինք նշել, որ նման մասշտաբի հանդիպման աշխատանքները տանելուն զուգահեռ պետք է չէ աշխատել տեղեկատվական դաշտում, այլ պետք է աշխատել այդ հանդիպման կազմակերպման ուղղությամբ, և եթե այդ հանդիպումը չկայանա՝ կստացվի հայկական դիվանագիտությունը չի հասել հաջողության: Հիմա այդպես էլ, փաստորեն, կարող է ստացվել: Ավելին, Փաշինյան-Թրամփ հանդիպման կոչով էին հանդես գալիս Թրամփի վարչակազմին ընդդիմադիր կոնգրեսականները, ինչը ինքնին արդեն կասկածի տակ էր դնում այդ հանդիպման կազմակերպման հնարավորությունը: Այժմ փորձենք հասկանալ, թե ինչ պայմաններում կարող է կայանալ Փաշինյան-Թրամփ հանդիպումը: Նախ՝ դրա համար հարկավոր է քաղաքական, տնտեսական, անվտանգության ոլորտում երկխոսության նյութի առկայության պայմաններում: Ներքաղաքական-տնտեսական համագործակցության երկկողմ հարաբերությունների խոսակցությունից բացի կարևոր է օրինակ ղարաբաղյան կարգավորման շուրջ թեմայի հնարավոր օրակարգը: Թե այս, թե մնացած բոլոր թեմաներում Հայաստանի կառավարությունը դեռևս չի կազմել առաջնահերթությունների այն շարքը, որոնք կարող են հետաքրքրել Միացյալ Նահանգներին: Ուստի՝ Փաշինյան-Թրամփ հանդիպման կազմակերպումն ի սկզբանե անհավանական էր թվում: Պաշտոնական Վաշինգտոն-Երևան հարաբերություններում Փաշինյանի կառավարությունը պետք է նախաձեռնողականություն ցուցաբերի: Հազիվ թե Վաշինգտոնի կողմից նման նախաձեռնողականություն ակնկակել: Իսկ ինչ ունի՞ ներկայացնելու Հայաստանը Միացյալ Նահանգների վարչակազմին՝ հետաքրքրելու առումով: Նախ՝ այս հարցի պատասխանը պետք է ունենան Փաշինյանի նոր կառավարությունում: Թամար Բագրատունի