Մտածող մարդիկ չեն ցանկանում քվեարկել Հայկ Մարությանի օգտին. Արտակ Զաքարյան

ՀՀ պաշտպանության նախկին փոխնախարար Արտակ Զաքարյանը ֆեյսբուքյան էջում անդրադարձել է Երևանի ավագանու արտահերթ ընտրությանը, մասնավորապես, «Իմ քայլը» դաշինքի քաղաքապետի թեկնածու Հայկ Մարությանին: Զաքարյանը գրառման մեջ նշել է. «Երևանի ավագանու ընտրություններին մնացել են հաշված օրեր, ու իմ տպավորությամբ՝ երևանցիները լոյալ վերաբերմունք ունեն դրա նկատմամբ: Նախ՝ առ այսօր չկա հստակ պատասխան, թե արդյո՞ք պահանջված էին ավագանու արտահերթ ընտրությունները: Քաղաքապետարանի դիմաց փոքրաթիվ մարդկանց մի քանի անբովանդակ ակցիաներ, որոշ լրատվամիջոցներում պատվիրված հրապարակումներ և արտահերթ ընտրություններն ապահովված են: Առնվազն տարօրինակ է: Ո՞րն է նպատակը, որՀայկ Մարությանը դառնա քաղաքապետ: Ինչո՞ւ հենց նա, չէ՞ որ իշխանափոխությանը մասնակցել են նաև արժանի ու պատրաստված կադրեր: Այս հարցն ամենաչպարզաբանվածն է, և որևէ տրամաբանական մեկնաբանություն առ այսօր չկա: Ովքե՞ր են պատրաստ ընտրել Մարությանին. որպես երկար տարիների եթերային կերպար՝ բոլորը նրան լավ ճանաչում են, և իմ տպավորությամբ՝ մտածող մարդիկ ուղղակի չեն ցանկանում քվեարկել նրա օգտին (թեկուզև համակրել են իշխանափոխությանը): Ի՞նչ է պետք անել, որպեսզի վերջինս ընտրվի՝ իհարկե, Նիկոլ Փաշինյանի անմիջական մասնակցություն քարոզարշավին, և ձեռքի հետ էլ հնարավորություն կլինի թեժացնել անկում ապրող էյֆորիան: Ի՞նչ է փոխվելու Երևանի և երևանցու կյանքում ընտրություններից հետո. էական ոչինչ: Այլ կուսակցություներն ունե՞ն ընտրվելու շանսեր. եթե վարչապետ Նիկոլ Փաշինյանը չխառնվի, ապա մյուսներն ավելի մեծ շանսեր ունեն հաղթելու, քան ՔՊ-ն: Հետևաբար, ո՞րն է Նիկոլ Փաշինյանի նպատակը: Արար 1 . Ցույց տալ, թե տեսե՛ք՝ ինչ արդար ու անկաշառ ընտրություններ են անցկացվել Երևանում: Արար 2. Երևանում ամրապնդել ՔՊ դիրքերն ու տնօրինել Երևանի վարչական ռեսուրսները, ինչպես նաև՝ համայնքային պաշտոններում տեղավորել նորաթուխ և անփորձ երիտասարդների (կամ ծանոթ-բարեկամների) նոր կազմ: Արար 3. Հիմքեր ստեղծել արտահերթ խորհրդարանական ընտրությունների համար: Հետևաբար, այս արտահերթ միջոցառման առաջին արարի նպատակն արդար ընտրությունների իմիտացիան է: Իսկ թե որքանո՞վ են դրանք ազատ, թափանցիկ ու արդար՝ հատուկ անդրադարձ է հարկավոր: Այնպես, որ այն, ինչ արվում է «հանուն ժողովրդի կամ ժողովրդի կամքով», դրանից ժողովուրդը դեռևս ոչինչ չի շահում»: