ՀՀԿ-ն ռեւանշ է վերցնում

Ազգային ժողովում բուռն քննարկում ծավալվեց Քննիչ հանձնաժողով ստեղծելու հարցի շուրջ։ Ելք խմբակցությունը պնդում էր, որ ԱԺ-ն դեռեւս չի կարող ստեղծել ԱԱԾ տնօրենի և ՀՔԾ պետի գատղտնալսման հարցով հանձնաժողով, քանի որ գործով նախաքննություն է ընթանում, իսկ ՀՀԿ-ականները հակադարձում են, որ քննության առարկան գլոբալ է լինելու, մասնավորապես՝ ապօրինի ձայնագրության հնարավորությունների վերաբերյալ։ Քննիչ հանձնաժողովի ստեղծման հարցով զեկուցող ՀՀԿ-ական պատգամավոր Գևորգ Կոստանյանը հիմնավորեց հետեւյալով․ «Այո, խոսքը ԱԺ կանոնակարգ օրենքի 23-րդ հոդվածի մասին է, և խնդիրը վերաբերում է նրան, որ, այո, կոնկրետ փաստերի հետ կապված հարուցվել է քրեական գործ: Երկու նկատառում՝ առաջինը, կոնկրետ քրեական գործերի մասին չէ խոսքը կամ կոնկրետ հանգամանքների: Ես ընդհանրացրեցի և ասացի, որ սա մեզ բերում է այն եզրահանգման, որ եթե ԱԱԾ տնօրենի և ՀՔԾ պետի հեռախոսային խոսակցության գաղտնիության սկզբունքը խախտվել է, ապա դա առնվազն հիմնավոր կասկածի տեղիք է տալիս ցանկացած քաղաքացու համար՝ արդյոք իր հեռախոսային խոսակցության գաղտնիությունը պատշաճ երաշխավորված է»,- մանրամասնեց Կոստանյանը: Ելք խմբակցության պատգամավոր Ալեն Սիմոնյանն հակադարձեց Գևոգ Կոստանյանին. «Պարոն Կոստանյան, դուք իրավաբանականում դաս եք տալիս, եթե ձեր ուսանողը ձեզ այսպես պատասխաներ, պետք է երկուս նշանակեիք, ուղարկեիք տուն»: Նա ասաց, որ ուզում են գործի անունը դնել տանձ, թե խնձոր, միեւնույն է դրանից խնդրի բնույթը չի փոխվում։ Գևորգ Կոստնայանը վրդովվեց. «Պարոն Սիմոնյան, իմ դասախոսական գործունեության վերաբերյալ ձեր գնահատականները դուք չեք կարող տալ, որովհետև դժբախտաբար ես ձեզ դաս չեմ տվել: Եթե ես ձեզ դաս տված լինեի, դուք նման ձևով չէիք վերաբերի Քրեական օրենսգրքին ու ԱԺ կանոնակարգ օրենքին»: Կոստանյանը կրկնեց, որ այն հանգամանքները, որոնցով քրեական գործ է հարուցված, հանձնաժողովի քննության առարկա չեն կարող հանդիսանալ: Դրա համար այդ հանգամանքները հիմք են հանդիսացել, որպեսզի խորհրդարանը քննարկման առարկա դարձնի հարցը՝ արդյոք մեր երկրում նամակագրության, հեռախոսային խոսակցությունների գաղտնիության և արդար դատաքննության իրավունքը պաշտպանված է, թե ոչ: «Ծառուկյան» խմբակցության պատգամավոր Վահե Էնֆիաջյանն էլ՝ հղում անելով ԱԺ կանոնակարգ օրենքի 23-րդ հոդվածին, ասաց, որ Քննիչ հանձնաժողովի քննության առարկա չեն կարող հանդիսանալ նախնական քննության կամ դատավարության այլ փուլում գտնվող հարցերը:«Քրեական երկու գործ է հարուցվել. ի՞նչ ենք քննարկելու: Օրենք մի՛ խախտեք, հարգելի գործընկերներ»,- հայտարարեց պատգամավորը: Չնայած քննադատությունների՝ ԱԺ-ն ընդունեց Քննիչ հանձնաժողովի անդամների թիվը սահմանելու մասին ԱԺ որոշման նախագիծը: Կողմ քվեարկեց 47, դեմ՝ 14 պատգամավոր: Նախքան քվեարկությունը ՀՀԿ-ականների կողմից հայտարարվեց, որ իրավունքի ուժով Քննիչ հանձնաժողովն արդեն ստեղծվել է, քանի որ բավարար ստորագրություններ են հավաքվել: ԱԺ նախագահ Արա Բաբլոյանն ասաց, որ հանձնաժողովում ՀՀԿ-ից կընդգրկվի 5, Ծառուկյան դաշինքից՝ 3, Ելք-ից՝ 2 և ՀՅԴ-ից՝ 1 պատգամավոր: Ուշագրավ է, որ կողմ քվեարկեց ՀՅԴ խմբակցությունը, դեմ Ելք-ն ու ԲՀԿ-ից ներկա որոշ պատգամավորներ։ Ըստ էության՝ ՀՀԿ-ն այս հանձնաժողովի միջոցով ջրի երես է հանելու նոր իշխանությունների բոլոր շինծու հայտարարությունները, որոնցով ազդում են հեղափոխական զանգվածների վրա, քանի որ այդ հանձնաժողովը պաշտոնական հարցումներ է ուղարկելու իրավասու մարմիններին՝ ԱԱԾ, ՀՔԾ, դատավորներ եւ այլն, հրավիրելու այդ մարմիններից ներկայացուցիչներ եւ ցույց տալու ողջ իրականությունը։ Ակնհայտ է, որ ՀՀԿ-ն ռեւանշ է վերցնում եւ իշխանությունների դեմ հակագրոհի անցնում բոլոր հարթակներում։ Երեկ էլ հայտնի դարձավ, որ ԵԽԽՎ հայաստանյան պատվիրակության ղեկավար Արփինե Հովհաննիսյանն է հորդորել Մոնիթորինգային հանձնաժողովին քննության տակ վերցնել Հայաստանում ստեղծված իրավիճակը, մասնավորապես՝ իր խոսքով՝ խոսքի ազատության, ժողովրդավարության հետընթացը եւ նախկին իշխանավորների նկատմամբ քրեական հետապնդումների փաստը։ Անի Սահակյան