Դատարանը 1 հոգու սպանելու, մեկին էլ վնասվածք պատճառելու մեջ կասկածվող 25-ամյա երիտասարդին կալանավորեց

Երեկ` մարտի 21-ին Հայաստանի քննչական կոմիտեի Տավուշի մարզային քննչական վարչության Բերդի քննչական բաժնի պետ Հունան Գարանյանը միջնորդություն է ներկայացրել Տավուշի մարզի ընդհանուր իրավասության դատարան, որպեսզի դատարանը որպես խափանման միջոց երկամսյա կալանքի որոշում կայացնի Բերդ քաղաքի բնակիչ, 25-ամյա Գրիգոր Մաթևոսյանի նկատմամբ: Ինչպես հայտնում է ֆոտոլրագրող Գագիկ Շամշյանը, դատավոր Զոյա Զաքինյանը դռնփակ դատական նիստն անցկացնելուց և խորհրդակցական սենյակից վերադառնալուց հետո բավարարել է քննչական բաժնի պետի միջնորդությունը և Գ. Մաթևոսյանը, ով մեղադրվում է համաքաղաքացիներ, 28-ամյա Գագիկ Ճաղարյանին սպանելու, իսկ 38-ամյա Վրեժ Մաթևոսյանին ծանր մարմնական վնասվածք պատճառելու մեջ` վերցվեց կալանքի և դատարանից տեղափոխվեց Վարդաշեն քրեակատարողական հիմնարկ: Ֆոտոլրագրողը հայտնում է, որ Գ. Մաթևոսյանին Բերդ քաղաքում ավելի շատ ճանաչում են որպես քրեական տարր, ով հաճախակի է անհարկի վիճաբանությունների մեջ մտել օրինապաշտ քաղաքացիների հետ: Նախկինում 2 անգամ եղել է դատապարտված, իսկ վերջին անգամ դատապարտվել է պայմանական ազատազրկման: Նրա կատարած անօրինական ու ոչ մարդակային բազմաթիվ քայլերի համար նրան ավելի շատ Բերդ քաղաքում ճանաչում են որպես «Կույրաղիք»: