Հայկ Մարությանը մեկ այլ սխալական հայտարարություն էլ է թույլ տվել. Արմեն Մարտիրոսյան

Բացի «սևերի ու սպիտակների» մասին հայտարարությունը, Երևանի քաղաքապետի «Իմ քայլը» դաշինքի թեկնածու Հայկ Մարությանը թույլ է տվել մեկ այլ սխալական հայտարարություն ևս, սակայն դրան բարեկամաբար ենք վերաբերվում։ Այս մասին Հայելի ակումբում լրագրողների հետ զրույցում հայտարարեց ավագանու ընտրություններում «Ժառանգություն» կուսակցության ցուցակի երկրորդ հորիզոնականում գտնվող Արմեն Մարտիրոսյանը։Մարտիրոսյանը սխալական համարեց այն արտահայտությունը, թե միայն ՔՊ–ում են հավաքված այն մարդիկ, որոնք ոչ միայն հեղափոխության ժամանակ, այլ դրանից առաջ են պայքարել: «Մենք բոլորս մարդ ենք, ուստի և սխալական, որևէ մեկն անսխալական չէ: Դրական եմ համարում, որ Հայկ Մարությանն ընդունեց իր ասածի սխալականության մի մասը, բայց այնտեղ մի հատված կար, որը ևս պարզաբանման կարիք ուներ: Թեև այդ ժամանակն անցել է։ Ինչևէ, մենք առաջ ենք շարժվում, ոչ թե կենտրոնանում ենք ինչ-որ բանի վրա»,–նշեց նա։ «Ժառանգություն» կուսակցության ցուցակը գլխավորող մյուս անդամը՝ Հովսեփ Խուրշուդյանն էլ կարևորեց, որ Մարությանը նոր է մտնում քաղաքականություն. «Հայկ Մարությանը հայտնի է որպես ուրախ տղա, դրական դաշտում գտնվող մեկը, իր այդ հայտարարությունն ինձ խորթ թվաց, նա եթե վերադառնա իր բնական վիճակին, այն դաշտին, որտեղ գտնվել է, ավելի լավ կլինի։ Իր կերպարը դրական է և ես նրան շատ լավ եմ վերաբերում։ Եթե քաղաքականություն մտնելիս վրիպումներ է թույլ տալիս, ոչինչ, շատ կցավեի, եթե դա թիմի մտածողության խնդիր լինի»։