Մոսկվային մատնացույց է արվում Փաշինյանի աքիլլեսյան գարշապարը
Սեպտեմբերի 8-ին Փաշինյան-Պուտին հանդիպմանն ընդառաջ հայաստանյան քաղաքական ուժերի կողմից ակտիվ հայտարարություններ են տեղում հայ-ռուսական հարաբերությունները փչացնելու նոր իշխանությունների վարած քաղաքականության առիթով: Առանձնապես ակտիվացել են ՀՀԿ-ական պատգամավորները, որոնք Ռուսաստանին սիրաշահելու համար յուղ են լցնում կրակի վրա: Էդուարդ Շարմազանովն ասում է, որ Փաշինյանի վարած քաղաքականությունը չի բխում հայ-ռուսական բարեկամական շահից, խոսքը մասնավորապես ՀԱՊԿ գլխավոր քարտուղար Յուրի Խաչատուրուրովի նկատմամբ հարուցված գործն է Մարտի 1-ի շրջանակներում, ինչին անդրադարձել է ռուսական կողմը՝ կոչ անելով չանել այնպիսի գործողություններ , որոնք վնաս կհասցնեն միջազգային կառույցի հեղինակությանը: ՀՀԿ-ական պատգամավոր Սամվել Ֆարմանյանը խորհրդարանում լրագրողների հետ զրույցում եւս չթաքցրեց մտահոգությունները հայ-ռուսական հարաբերությունների վերաբերյալ.«Մենք մեր մտահոգությունն ենք հայտնել Հայաստան-Ռուսաստան հարաբերություններում Նիկոլ Փաշինյանի վարչապետության օրոք տեղ գտած իրողությունների առթիվ: Ես հուսով եմ, որ բոլոր գործողությունները, որոնք մեր իշխանությունների կողմից ձեռնարկվում են կամ կձեռնարկվեն, դրանք կբխեն բացառապես Հայաստանի Հանրապետության ազգային պետական երկարատև շահերից, նախկին փորձի համակողմանի ուսումնասիրությունից բխող որոշումներ կլինեն: Եվ ի վերջո, գուցե մի օր վերանան նաև այն խութերը, մտահոգությունները, որոնք արտահայտում ենք ոչ միայն ես ու իմ շատ գործընկերներ, այլ շատ անաչառ փորձագետներ»,- նշեց նա: Ըստ Ֆարմանյանի՝ ՀՀ այսօրվա իշխանությունները պետք է առաջնորդվեն բացառապես Հայաստանի պետական ազգային շահերով, իսկ դա ենթադրում է Հայաստանի արտաքին քաղաքական նախորդ կուրսի շարունակություն: ՀՅԴ-ական Արմեն Ռուստամյանը կիսում է ՀՀԿ-ականների կարծիքը, ասելով՝ որ խնդիրներ կան այդ հարաբերություններում, դրսեւորվում է նաեւ Ռուսաստանի արտգործնախարարի հայտարարություններից: Նա կոչ է անում Փաշինյանին առաջիկա հանդիպման ժամանակ քննարկման առարկա դարձնել բոլոր հարցերը եւ գալ կոմպրոմիսային լուծման: Ռուստամյանը համաձայն է պաշտոնական Մոսկվայի տեսակետին համաձայն որի՝ Հայաստանի ներքին իրադարձությունները չպետք է ազդեն Հայաստանի պարտավորությունների վրա, որոնք Հայաստանն ունի ԵՏՄ և ՀԱՊԿ առաջ: «Եվ այն քայլը, որը կատարվեց ՀԱՊԿ գլխավոր քարտուղար Խաչատուրովի հետ կապված, բնականաբար, կարող էր իսկապես այդպիսի տպավորություն առաջացնել Ռուսաստանի մոտ, որ այդ կազմակերպության հեղինակության հետ կապված հարց է առաջանում: Դուք կարո՞ղ եք պատկերացնել, որ ՆԱՏՕ-ի գլխավոր քարտուղարին առանց հետ կանչելու մեղադրանք առաջադրեն, այդ կարգավիճակով մեղադրյալի աթոռին նստի»,- նշեց նա՝ հավելելով, որ Քոչարյանի հետ կատարվածն էլ աննախադեպ էր ԱՊՀ տարածքում, ինչին անդրադարձել է Ռուսաստանը: Դաշնակցականի համոզմամբ հայ-ռուսական հարաբերությունների լարման պատճառը, սակայն, Ռոբերտ Քոչարյանը չէ, միգուցե նա անձնական ջերմ հարաբերություններ ունի Պուտինի հետ, բայց ռուսական կողմի մտահոգությունները օբյեկտիվ են: Հայ-ռուսական հարաբերություններում, Նիկոլ Փաշինյանի կուսակից Ալեն Սիմոնյանի վստահեցմամբ որեւէ արտառոց փոփոխություն տեղի չի ունեցել, քաղաքական նոր իրավիճակ է եւ այդ իրավիճակին Հայաստանի վարած կուրսը ուսումնասիրվում է ոչ միայն Ռուսաստանի, այլեւ մնացած բոլոր գերտերությունների կողմից.<<Անհանգստանալու բան չկա, մենք շարունակելու ենք լավ հարաբերությունները>>: Ակնհայտ է, որ նախկին իշխանության ներկայացուցիչների համար Փաշինյանի աքիլլեսյան գարշապարը արտաքին ճնշումն է: Նրանք հասկանում են, որ վարչապետն ունի ներքին աջակցություն՝ ի դեմս հազարավոր քաղաքացիների, որոնք վերջին հանրահավաքին ցույց տվեցին այդ աջակցությունը եւ կարծում են, որ Փաշինյանին իշխանությունից հեռացնելու միակ ճանապարհը մնացել է Մոսկվան, որն իր հերթին առանձնապես հիացած չէ նորերի կադրային քաղաքականությամբ եւ գրանտային միջոցներով սնվող պաշտոնյաների ներգրավմամբ: Անի Սահակյան
Հետևեք մեզ Viber-ում
