Ժողովո՞ւրդն է ասում, մեզ ընտրակաշառք տվեք, թե չէ կգնանք օլիգարխների կքառատենք. Հայկ Կոնջորյան
ԱԺ արտահերթ նիստում «Ելք» խմբակցության պատգամավոր Հայկ Կոնջորյանը՝ «ՀՀ քրեական օրենսգրքում փոփոխություններ կատարելու մասին» նախագիծը քննարկելու ժամանակ հայտարարեց, որ սխալ ձևակերպում է տրվում ՀՀԿ պատգամավորների կողմից: Հայկ Կոնջորյանն էլ նախագծի զեկուցող արդարադատության փոխնախարարից փորձեց պարզել՝ ի վերջո ընտրակաշառքի հարցում առաջա՞րկն է ծնում պահանջարկ, թե՞ պահանջարկն է ծնում առաջարկ. «Մենք քննարկում ենք Հայաստանի ժողովրդավարության, քաղաքական համակարգի ամենավճռորոշ և ամենակարևոր թեմաներից մեկը և այստեղ պետք է կարևոր ու ելակետային հարց տանք: Ի վերջո, ընտրակաշառքի հարցում առաջա՞րկն է ծնում պահանաջարկ, թե՞ պահանջարկն է ծնում առաջարկ, որտեղի՞ց է գալիս գլխավոր մեղավորությունը: Ժողովո՞ւրդն է ասում՝ մեզ ընտրակաշառք տվեք, թե չէ կգնանք քաղաքական գործիչներին, օլիգարխների կքառատենք, թե, ի վերջո, մեղավոր են քաղաքական տնտեսական շահեր ունեցող ամենատարբեր էլիտաների ներկայացուցիչները»: Կոնջորյանն իր ելույթում ասաց, որ, ցավոք, նիստում քննարկվում էին կաշառք վերցնողների հարցերը. «Մենք այս վերջին ընտրությունների արդյունքում ունենք այս դահլիճում նստած դոլարային միլիոնատերեր և մուլտիմիլիոնատերեր: Ասեք ինձ, խնդրում եմ, ո՞րն է դոլարային մուտիմիլիոնատիրոջ մոտիվացիան, որ ինքը ընտրվում է պատգամավոր, որպեսզի 450 հազար դրամ աշխատավաձով ծառայի սեփական ժողովրդին: Ախր խաշած հավի ծիծաղն է գալիս, որ այդ միլիոնատերն է ուզում 450 հազար դրամ աշխատավարձ ստանա, որպես պատգամավոր ծառայի ժողովրդին»,- նշեց Հայկ Կոնջորյանը:
Հետևեք մեզ Viber-ում
