ՀՔԾ պետը պատասխանում է այնքանով, որքանով ձեռնտու է իրենց. Ռ. Քոչարյանի պաշտպան (video)
Երկրորդ նախագահ Ռոբերտ Քոչարյանի պաշտպան Հովհաննես Խուդոյանն այսօր լրագրողների հետ հանդիպման ժամանակ հայտարարեց, որ նախկին նախագահի տանը խուզարկություն կատարելու կամ հարուցված քրեական գործի մասին խոսելիս ՀՔԾ պետ Սասուն Խաչատրյանը ընտրողական մոտեցում է ցուցաբերում թափանցիկության ու հրապարակայնության առումով: Ըստ նար՝ ՀՔԾ պետը պատասխանում է այնքանով, որքանով ձեռնտու է իրենց: Խոսքը ոչ թե նախաքննական գաղտնիք պարունակող տեղեկությունների մասին է, այլ այն բանի, որ ՀՔԾ-ն հաճախ կատարում է ոչ իրավաչափ գործողություններ, և երբ այդ մասին հարցեր է ստանում լրագրողների կողմից, պատասխանում է, թե չի ցանկանում նախաքննական գաղտնիք հրապարակել: Ռոբերտ Քոչարյանի մյուս պաշտպան Արամ Օրբելյանն էլ հայտարարեց, որ իրենք բազմիցս ասել են` իր լիազորություններից ելնելով կատարած գործողությունների համար նախագահը չի կարող պատասխանատվության ենթարկվել և ՀՔԾ-ն իրավունք չուներ այդ գործին մոտենալ որպես սովորական հանցագործություն և կալանավորել ՀՀ նախագահին: «Եթե նախագահը պաշտոնավարման ժամանակ կատարեր գողություն կամ մարդասպանություն, ապա դա կարող էր համարվել իր կարգավիճակից չբխող, սակայն Վերաքննիչ դատարանը հաստատեց, որ Ռոբերտ Քոչարյանի գործողությունները միանշանակ բխել են նրա կարգավիճակից»,- ասաց Արամ Օրբելյանը:
Հետևեք մեզ Viber-ում
