Մենաշնորհը կոտրված է

Նիկոլ Փաշինյանի քաղաքապետի թեկնածու Հայկ Մարությանի՝ հասարակությանը սեւերի ու սպիտակների բաժանելու մասին չարաբաստիկ հայտարարությունից հետո Երեւանի ավագանու ընտրություններում որոշակի ինտրիգ է մտնում, եթե կուզեք՝ խառնում խաղի կանոնները, այն խաղի, որի սցենարը նախապես բոլորին հայտնի էր թվում: Համաձայն դրա,մայրաքաղաքի ընտրողը առարկություններ ունենալով Հայկ Մարությանի թեկնածության հարցում, մասնավորապես այն իրողության, որ վերջինս հեռու է քաղաքականության եւ կառավարման ոլորտից ու հայտնի է ցածրակարգ սերիալներում կոմիկական դերեր մարմնավորելով, այդուհանդերձ իր ձայնը տալու է նրան ակնկալիքով, որ Փաշինյանի թիմը հետագայում Կարգին Հայկոյին աջակցությամբ կիրականացնի մայրաքաղաքի կառավարումն այնքան, մինչեւ դերասանից Հայկը դառնա քաղաքական գործիչ: Բայց Մարության վերջին հայտարարությունը, որը կապ չուներ կառավարման հմտությունների հետ եւ արտացոլում էր նրա մարդկային ու բարոյական նկարագիրը, գավառական մտածողությունը, ըստ էության շեշտակի նվազեցրեց նրա շանսերը, քանի որ Երեւանի էլեկտորատի առանձնահատկությունն էլ այն է, որ աչքի է ընկնում առավելապես գիտակից, քաղաքակիրթ մարդկանցով, որոնք էյֆորիկ տրամադրությանը հակակշռելու են սթափ հաշվարկներով: Եւ այսպիսով առաջ են գալու իշխանությանը իրական այլընտրաքներ: Եթե կուզեք այդդպիսի այլընտրանք կարող է հանդիսանալ անգամ Անահիտ Թարխանյանը՝ ճարտարապետ, ով բավական գրագետ եւ բանիմաց թիմ է հավաքել, որին իրենց աջակցությամբ առավել ծանրակշիռ են դարձնում հրամանատար Արկադի Տեր-Թադեւոսյանը՝ Կոմանդոսը եւ Հասմիկ Պապյանը: Բնականաբար այլընտրանքի դերում կարող է հանդես գալ նաեւ Փաշինյանի գործընկերների՝ Արամ Սարգսյանի եւ Էդմոն Մարուքյանի ձեւավորած Լույս դաշինքը՝ Արտակ Զեյնալյանի գլխավորությամբ, վերջինիս մարդկային տեսակով պայմանավորված ստվար զանգվածների աջակցություն կարելի է ստանալ: Բնականաբար, թիվ մեկ այլընտրանքը մնում է Նաիրա Զոհրաբյանը ոչ միայն զտարյուն քաղաքական գործչի իր կերպարով կհակադրի Հայկ Մարությանի կիսադերասանական տաղանդին, այլ Զոհրաբյանը իր քաղաքական թիմով կարող է քաղաքային իշխանությունը վերցնելու հայտ ներկայացնել: Նկատենք, որ Ծառուկյանի թիմն ակտիվ աշխատում է այդ ուղղությամբ եւ անձամբ Ծառուկյանը մի քանի օր է սկսել է ոչ պաշտոնական քարոզարշավը: Այս թիմի միակ խոցելի կետը նախկին իշխանությունների հետ ասոցացիան է, կապը այդ իշխանության հետ, սակայն Ծառուկյանը կարծես թե հասցրել է փակել այդ թեման՝ ասելով, որ անցել են ժամանակները, երբ բոլոր ճանապարհներն անցնում էին Մելիք Ադամյանով ու այնտեղից էին թելադրվում՝ ով ինչ պետք է աներ: Հիմա նա ինքն է որոշում իր քաղաքական կուրսը, որը տեղավորվում է հեղափոխական տրամաբանության մեջ: Վճռորոշ պահին Ծառուկյանը միացավ հեղափոխությանը, ԱԺ-ում կապիտալիզացրեց այդ հեղափոխության հաղթանակը՝ քվեարկելով վարչապետի թեկնածուի օգտին, հիմա էլ կառավարության մաս է կազմում, միեւնույն ժամանակ պատեհ առիթով հիշեցնում, որ վարչապետի ընտրությանը կեսից ավելին իր թիմի ձայնով է Փաշինյանը անցել, ասել կուզի ինքը բոլոր իրավունքներն ունի տնօրինելու իշխանության կեսը, որը Երեւան քաղաքի նվաճման տեսքով կարող է լինել, անշուշտ, կարելի է կարծել, թե այլ ճանապարհ Ծառուկյանին չէր մնացել , սակայն քաղաքականության մեջ ամեն ինչ հնարավոր է մանեւրների միջոցով, եւ Ծառուկյանը հանգիստ կարող էր չաջակցել Փաշինյանին: Անի Սահակյան