Երեխուն գործի դիր, ետեւից գնա

Նիկոլ Փաշինյանի թիմը մանկապարտեզ է հիշեցնում, որտեղ դաստիարակն էլ վարչապետ Փաշինյանն է։ Երբ մի գործ հանձնարարվում է երեխաներին, դաստիարակն էլ հետեւից է գնում․․.Ահավասիկ Երևանի ավագանու ընտրությունների համար կազմակերպված դրամահավաքով այդ թիմը տվեց ոչ պաշտոնական քարոզարշավի խայտառակ մեկնարկը, այն հարուցեց հանրության ստվար շերտերի զայրույթը։ Փաշինյանի քաղաքապետի թեկնածու Հայկ Մարությանի թեթեւ ձեռքով հասարակությունը տարանջատվեց սեւերի ու սպիտակների, մի քանի րոպեում ի չիք դարձրեց սիրո եւ համերաշխության մթնոլորտը։ Հայաստանում իրականացված հեղափոխությունից հետո հանրային համախոհության, համերաշխության, արժանապատվության մթնոլորտն անմիջապես գունափոխվեց սեւերի ու սպիտակների, այլագույններն էլ մնացին օդում կախված․․․ Մարությանի՝« մեր դեմ խաղ չկա» հայտարարությունն էլ ջուրը գցեց հեղափոխականների բոլոր հավաստիացումները, թե Հայաստանում ժողովրդավարության հիմքեր է դրվել։ Մարությանը նշել էր, որ իրենք դրամահավաքն անցկացնում են իրենց քաղաքական պայքարը շարունակելու համար, և ավագանու ընտրություններին մասնակցող իրենց թիմը ուժեղ է. «Նույնիսկ կարող եմ ասել՝ մեր թիմի դեմը խաղ չկա»,- ասել է նա շարունակելով,-«Այսօր Հայաստանում իրավիճակը շատ պարզ է. կան սպիտակ ուժեր, և կան սև ուժեր, վերջ։ Ես ուզում եմ պաշտոնական հայտարարել, չնայած գիտեք, բայց պետք է ասեմ՝ այո՛, մենք սպիտակ ուժերն ենք, իսկ բոլոր նրանք, ովքեր չեն ուզում, որ մենք հաջողություն ունենանք, ես կարող եմ ասել, որ սև ուժերն են։ Որովհետեւ մենք և մեր հաջողությունը Հայաստանի հաջողությունն է։ Ոչ ոք մեզանից անձնական շահեր, անձնական ինչ-որ ամբիցիաներ չունի»։ Քաղաքապետացուի այս հայտարարությունից բարձրացած փոթորիկը ստիպեց թիմին սրբագրել քաղաքականապես եւ բարոյապես բոբիկ, էջժանագին սերիալների հերոսի կարգին խայտառակությունը եւ մեկ օր անց Կարգինի ֆեյսբուքի էջում սրբագրել վերջինիս խայտառակությունները․ «Ես ամենևին անթերի չեմ, և կարծում եմ, որ կարող էի ավելի հստակ ձևակերպել խոսքս, և, գուցե, այդ դեպքում տարընթերցումներ չլինեին։ Ուզում եմ հստակ ֆիքսել, որ Հայաստանում կա ընդամենը մեկ սուբյեկտ, որի դեմ խաղ չկա, և դա Հայաստանի ժողովուրդն է։Ու, այո, բոլոր այն ուժերը, որոնք տարիներ շարունակ բռնացել են ու դեռ փորձելու են բռնանալ ժողովրդի ազատության և արժանապատվության վրա, խաբել ժողովրդին, կանխել վերջինիս առաջընթացն ու հաջողությունը, սև ուժեր են, և ես անձամբ իմ պարտքն եմ համարել և համարում անել ամեն ինչ, որպեսզի նրանք այլևս երբեք չկարողանան դա անել։ Ընտրությունը ժողովրդինն է, և ես համոզված եմ, որ մեր թիմը կարժանանա վերջինիս վստահությանը»։ Թվում էր, թե իրավիճակը ինչ-որ չափով սրբագրվել էր եւ հանրային դժգոհության ալիքը նվազել, սակայն, հոպ, երեկ երեկոյան լրատվամիջոցներից մեկը պատահական բռնացրել է Հայկ Մարությանին ու նա նորից կրկնել է այն խայտառակությունը, ինչ դուրս էր տվել նախապես, աշխատանքային փակ քննարկումից առաջ պատասխանելով 24News֊ի հարցերին, Մարությանը, նշել է. «Կոնտեքստից հանած խոսքի խնդիր կա, այսինքն՝ շատ սիրում են հիմնական միտքը կտրել ու խոսքն աղավաղել։ ․․․Ես ասել եմ՝ սա ինձ հիշեցնում է մաֆիա խաղը. սևերը մաֆիայի պես ի հայտ եկան»։ Այսինքն, որքան էլ սրբագրում, սխալների ուղղում են թիմով փորձում անել, այդուհանդերձ պարզ է դառնում, որ Մարությանը հենց այդ մտածողության կրողն է, նրա համար հասարակությունը իր խաղացած էժանագին սինքրոմների պես բաժանվում է հերոսների եւ հակահերոսների։ Սա նախեւառաջ անարգանք է մրցակից գործընկերների նկատմամբ, փաստացի առաջադրված մնացած բոլոր ուժերը առանց բացառության աջակցել են թավշյա հեղափոխությանը, իսկ հիմա ժողովրդավարական պետությունների խաղի կանոններով մասնակցում են ընտրությունների, մինչդեռ իշխանական թեկնածուն համարում է, որ եկել են միապետության ժամանակները եւ իրենցից բացի բոլորը սեւ են։ Պատահական չէ, որ Մարությանի մի քանի անգամյա ձախողումը որոշեց սրբագրել նաեւ Փաշինյանը, քիչ առաջ նա անդրադառնալով հարցին ասել է ՝ գուցե թյուրըմբռնում է եղել. «Կարծում եմ, որ թյուրըմբռնում կա գուցե, Հայկ Մարությանն էլ ընդունել է, որ իր ձևակերպումներն այդքան էլ ճշգրիտ չեն եղել»: Միայն թե Մարությանը ոչ մի կերպ չի ըմբռնում, որքան էլ փորձում են դա նրան հասկացնել։ Անի Սահակյան