Խաղաղ տապալման ռեժիմով. Դանդաղ «ռումբ»՝ Բաքվի համար
Օրերս առաջ մի խումբ եվրոպացի պատգամավորներ՝ գերմանացի օրենսդիր Մարտին Զոննեբորնի գլխավորությամբ, այցելել էին Արցախ և հանդիպել տեղի իշխանությունների հետ: Բաքվում հիստերիա բարձրացավ: Ի պատասխան Ադրբեջանի արտգործնախարարության խոսնակ Հիքմեթ Հաջիևն ոչ ավել, ոչ պակաս ասել է. - «Ծաղրածուների ու խեղկատակների հյուրախաղերը Ադրբեջանի գրավյալ տարածքներում շարունակվում են, և դրանցից հերթականը Մարտին Զոննեբորնի այցն էր»: Հիշեցնենք, որ ավելի վաղ գերմանացի մեկ այլ պատգամավորի՝ Ալբերտ Վայլերի՝ Ղարաբաղ կատարած այցի պատճառով դիվանագիտական սկանդալ էր ծագել Գերմանիայի և Ադրբեջանի միջև: Բաքուն հրաժարվել էր մուտքի արտոնագիր տալ Բունդեսթագի պատգամավորին, երբ վերջինս ցանկացել էր Ադրբեջան այցելել՝ կանցլեր Անգելա Մերկելի պատվիրակության կազմում: Երեկ նաև հայտնի դարձավ, որ պաշտոնական Բաքուն դիմել է Ինտերպոլին՝ խնդրելով միջազգային հետախուզում հայտարարել պոկերի արքա Դեն Բիլզերյանի նկատմամբ, որն ավելի վաղ այցելել էր Արցախ: «Ինտերպոլին հարցում է ուղարկվել՝ խնդրանքով միջազգային հետախուզում հայտարարել անօրինական կերպով Ադրբեջանի օկուպացված տարածքներ այցելած հայ շուլեր Դեն Բիլզերյանի նկատմամբ»,- ասվում է Ադրբեջանի գլխավոր դատախազության հաղորդագրության մեջ: Արցախի միջազգային ճանաչման հարցում վերջին տարիներին քննադատվել են նախկին իշխանությունները: Այդ գործընթացը կարծես ինքնահոսի է թողնված: Ամեն ինչ տեղի է ունենում կարծես միջազգային հանրության կողմից պատրաստակամության շրջանակներում: Հայաստանը, շարունակելով մասնակցել արցախյան խնդրի խաղաղ կարգավորման բանակցություններին՝ կարող է և պետք է զբաղվի Արցախի միջազգային ճանաչման գործով, կոնկրետ մարտավարությամբ ու ռազմավարությամբ: Ի դեպ, այս գործում մեզ ինչ-որ առումով «աջակցում» է Ալիևն իր հայատյացության, թշնամական ու ռազմատենչ քաղաքականությամբ: Նա ամեն ինչ անում է, որպեսզի հայկական կողմն ավելի ծանրակշիռ հիմքեր ունենա Արցախի ու արցախցիների՝ Ադրբեջանի հետ շփման բացառման հարցում ապացույցներ ունենալու հարցում: Դա յուրօրինակ «նվեր» է մեզ համար: Այնպես որ, մնում է միջազգային հանրությանը ճիշտ ուղերձներ հղել, ճշգրիտ աշխատանք տանել՝ Արցախը ինքնորոշված, նաև միջազգային ճանաչման հասցնելու նպատակով: Թամար Բագրատունի
Հետևեք մեզ Viber-ում
