Բոլոր կոնֆլիկտները պետք է լուծվեն խաղաղ ճանապարհով. Վարչապետ

Նիկոլ Փաշինյանը՝ Երևանում գտնվող վրացի լրագրողներին տված հարցազրույցում՝ պատասխանելով Ռուսաստանի կողմից Վրաստանի տարածքների օկուպացման և տարածաշրջանում խաղաղության հասնելու մասին հնչեցված հարցին, ասել է. «Պատրաստ ենք աջակցել ցանկացած երկրի՝ կոնֆլիկտի խաղաղ կարգավորման հարցում»: Ինչպես գրում է վրացական Առաջին ալիք ՀԸ կայքը, Փաշինյանը նշել է, որ շատ զգույշ պետք է լինել կոնֆլիկտների մասին խոսելիս: «Պետք է զրուցել մեր տարածաշրջանում և ողջ աշխարհում կոնֆլիկտի ընդհանուր ընկալման մասին: Մեր դիրքորոշումն է, որ բոլոր կոնֆլիկտները պետք է լուծվեն խաղաղ ճանապարհով, խաղաղ բանակցությունների միջոցով: Միևնույն ժամանակ, համարում եմ, որ բոլոր կոնֆլիկտները եզակի են: Միմյանց նման կոնֆլիկտներ չկան: Շատ զգայուն պետք է լինել կոնֆլիկտների մասին խոսելիս: Կարծում եմ՝ Հայաստանի դիրքորոշումը հստակ է: Մենք խոսում ենք կոնֆլիկտի կարգավորման բանաձևի մասին, որը պետք լինի ընդհանուր՝ բոլոր կոնֆլիկտների համար, և որը կբացառի բռնի կերպով կոնֆլիկտի կարգավորումը: Մենք պատրաստ ենք դրան, Լեռնային Ղարաբաղի կոնֆլիկտի դեպքում և նույնպես պատրաստ ենք աջակցել ցանկացած այլ երկրի, կոնֆլիկտների կողմերին՝ բանակցություններ վարելու և կոնֆլիկտը խաղաղ ճանապարհով կարգավորելու հարցում»,- հայտարարել է Նիկոլ Փաշինյանը: