Դպրոցի տնօրենները քննություն կհանձնեն համակարգչով. ուրիշ ինչ է փոխվել հավաստագրման կարգում

    ՀՀ կրթության և գիտության նախարար Արայիկ Հարությունյանի հրամանով փոփոխություններ են կատարվել հանրակրթական ուսումնական հաստատության ղեկավարման իրավունք` հավաստագիր ստանալու կարգում: Հրամանով սահմանվել է հանրակրթական ուսումնական հաստատության ղեկավարման իրավունք  ստանալու քննության կազմակերպման, անցկացման կարգը, ինչպես նաև ուսումնական հաստատության ղեկավարման իրավունքի  դադարեցման դեպքերն ու կարգը: Փոփոխություն է կատարվել քննության թեսթավորման փուլի ընթացակարգում, մասնավորապես նախատեսվել է էլեկտերանային թեստավորում, որը նորություն է և նախկինում չի եղել: Էլեկտրոնային թեստավորման ժամանակ  յուրաքանչյուր հավակնորդի համակարգ մուտք գործելու համար տրամադրվում է օգտանունն ու գաղտնաբառ, միասնական բազայից ձևավորում է 60 հարցից բաղկացած թեստ, տրվում է 60 րոպե ժամանակ` երեք կամ չորս ենթադրյալ պատասխաններով հարցերից ճիշտ պատասխանն ընտրելու համար: Հավակնորդը ծանոթանում է հարցերին և յուրաքանչյուր հարցի վերաբերյալ նախատեսված համապատասխան վանդակում կատարում է նշում` ընտրելով մեկ (իր կարծիքով` ճիշտ) պատասխան: Աշխատանքն ավարտելուց հետո թեստի ներքևում ստեղծված «Ավարտել» կոճակը սեղմելով` հավակնորդը տեսնում է  ճիշտ պատասխանների քանակը և ընդհանուր առաջադրանքների համեմատ ճիշտ պատասխանների տոկոսային հարաբերությունը։ Հատկացված ժամանակը սպառվելուց հետո համակարգը ավտոմատ փակվում է: Զուգահեռաբար պահպանվել է նաև թեստավորման նախկինում գործող գրավոր փուլը, որն, ըստ նոր կարգի, կկազմակերպվի Էլեկտրոնային թեստավորում անցկացնելու անհնարինության դեպքում: Գրավոր քննության հարցաշարում փոփոխություններ չեն արվել: Փոփոխություն է կատարվել նաև հավաստագրման քննության բանավոր`հարցազրույցի փուլում.  նախ փոխվել են բանավոր փուլի հարցերը, բացի այդ` հարցազրույցի անցկացման և գնահատման ընթացակարգում ևս նոր պահանջներ են սահմանվել, որոնք նախկինում չկային Նոր կարգով` համակարգչում նախօրոք զետեղված հարցերից պատահական ընտրությամբ ձևավորում է 5 հարցից բաղկացած հարցատոմս, որը տրվում է մասնակցին: Յուրաքանչյուր հարց գնահատվում է առավելագույնը 2 միավոր: Հանձնաժողովին տրվում է համակարգչից դուրս բերված հարցատոմսի հարցերի ճիշտ պատասխանները` 3 օրինակ: Հավակնորդը, ծանոթանալով հարցատոմսին, իր կողմից նախընտրած հերթականությամբ պատասխանում է հարցերին:Հանձնաժողովի յուրաքանչյուր անդամ մասնակցի պատասխանը գնահատում է հանձնաժողովի նախագահի կողմից կնքված և ստորագրված գնահատման թերթիկի միջոցով: Սխալ պատասխանի դեպքում գնահատվում է 0, թերի պատասխանի դեպքում՝ տվյալ հարցի համար տրված միավորի կեսը, իսկ ճիշտ պատասխանի դեպքում՝ տվյալ հարցի համար տրված միավորն ամբողջությամբ: Յուրաքանչյուր պատասխանից հետո հանձնաժողովի նախագահը հնչեցնում է ճիշտ պատասխանը: Հարցազրույցի փուլում հավակնորդի ստացած միավորների տոկոսային արտահայտությունը պետք է լինի առնվազն յոթանասունհինգ տոկոս` հարցազրույցի փուլը հաղթահարելու համար: Հաջորդ փոփոխությունը կապված է հավաստագրման քննության պարտադիր լինելու պահանջի հետ: Այստեղ ըստ էության չեղյալ է հայտարարվել հավաստագրման կարգում նախկին նախարար Լևոն Մկրտչյանի կողմից կատարված փոփոխությունը, ըստ որի մեկ անգամ հավաստագիր ստացած անձը երկրորդ անգամ առանց գրավոր քննության` միայն հարցազրույցով կարող էր ստանալ նոր հավաստագիր` եթե չէր լրացել նախորդ հավաստագրի ուժի մեջ գտնվելու 5 տարվա ժամկետը: Այժմ սակայն վերադարձ է արվում նախկին, այսպես կոչված աշոտյանական տարբերակին, ըստ որի հավաստագիրը պարտադիր փաստաթուղթ է հանրակրթական ուսումնական հաստատության տնօրենի թափուր տեղի մրցույթին մասնակցելու, նշանակվելու կամ ընտրվելու համար՝ անկախ հանրակրթական ուսումնական հաստատության կազմակերպաիրավական ձևից և ենթակայությունից:Նշենք, որ հավաստագիրը տրվում է 5 տարի ժամկետով և այդ ժամկետի սպառվելուց հետո հավակնորդը պետք է նորից մասնակցի վերապատրաստման դասընթացի, ստանա համապատասխան վկայական, որից հետո մասնակցի հավաստագրման քննություններին: Վերեպատրաստուման դասընթացներ իրականացվում են ԿԳ նախարարության կողմից երաշխավորված կազմակերպությունների կողմից: Ի դեպ, վերապատրաստումները վճարովի են` դրանց արժեքը որպես կանոն տատանվում է 60-80 հազար դրամի սահմանում: Կարինե Սարիբեկյան