Սեպտեմբերի 15-ից հացահատիկի թանկացումն անխուսափելի կլինի

Սևանից լրացուցիչ ջրառի մասին օրինագծի քննարկման ընթացքում պատգամավորներից ոմանք հանդես են եկել նաև ցորենի և ալյուրի հնարավոր թանկացման հարցի շուրջ հայտարարություններով։ «Ելք» խմբակցության անդամ Էդմոն Մարուքյանն ասել է, որ հարցի շուրջ խոսել է հացահատիկ ներկրողների հետ և հանգել այն եզրակացության, որ հացահատիկի թանկացումը սեպտեմբերի 15-ից հետո անխուսափելի է: «Ես խոսել եմ տրանսպորտային ընկերությունների ղեկավարների հետ, նրանք ասում են, որ տոննայի մեջ 50 դոլար կթանկանա, եթե միայն Փոթիով գա հացահատիկը: Այնտեղ մոնոպոլ գործունեության հարց էլ կա: Բնականաբար, դա Վրաստանի ներքին գործն է, բայց եղբայրական պետություններ ենք, Հայաստան-Վրաստան բարեկամական խումբը պետք է զբաղվի այս հարցով: Ժամանակը շատ կարճ է, եթե սեպտեմբերի 15-ին այս որոշումն ուժի մեջ մտնի, մենք լուրջ խնդիրներ կունենանք: Առանց այն էլ հացը թանկացել է Ռուսաստանում հացահատիկի թանկացման հիմքով, հիմա էլ կարող է թանկանալ արդեն Վրաստանից վերգետնա տրանսպորտով հացահատիկի ներմուծումն արգելելու հիմքով»,-ընդգծեց Մարուքյանը: ԱԺ փոխնախագահ, Հայաստան-Վրաստան բարեկամական խմբի ղեկավար Էդուարդ Շարմազանովն էլ հայտնեց, որ այդ հարցով արդեն կապ է հաստատել Վրաստանի խորհրդարանականների հետ, իսկ սեպտեմբերին նախանշված է նաև երկու երկրների պատգամավորների հանդիպումը` նշված հարցի քննարկման նպատակով. «Այո, խորհրդարանն իր լիազորությունների շրջանակներում ամեն ինչ կանի, բայց կարծում եմ, այստեղ նախ և առաջ անելիք ունեն մեր հարգարժան կառավարության ներկայացուցիչները»: