Ինչո՞վ բացատրել Ալիևի «առատաձեռնությունը» Փաշինյանի հանդեպ
«Հայաստանում ներկայումս ներքաղաքական պրոցեսներ են ընթանում և մենք չէինք ցանկանա դրանք մեկնաբանել։ Միաժամանակ, հակամարտության կարգավորման ձևաչափը, և օրակարգը հայտնի է։ Հակամարտությունը պետք է լուծվի ԵԱՀԿ Մինսկի խմբի համանախագահության ձևաչափի շրջանակներում, հակամարտող կողմեր Հայաստանի և Ադրբեջանի մասնակցությամբ։ Հայաստանի զինված ուժերը պետք է դուրս բերվեն Ադրբեջանի գրավյալ տարածքներից, որից հետո էլ պետք է սկսվի հակամարտության կարգավորման քաղաքական գործընթացը»,- Москва-Баку պարբերականի հետ զրույցում հայտարարել է Ադրբեջանի ԱԳՆ խոսնակ Հիքմեթ Հաջիևը, հավելելով, որ ներկա պահին հայկական կողմն ուսումնասիրում է Ղարաբաղյան հակամարտության կարգավորման փաստաթղթերը։ Փաշինյանը, պարզ է, որ որոշակի ժամանակ է վերցրել՝ ծանոթանալու ղարաբաղյան կարգավորման գործընթացի բոլոր նրբություններին: Հայտնի է, որ ԼՂ հարցով քննարկումներ էր ունեցել նախկին ԱԳ նախարար Էդվարդ Նալբանդյանի, նախկին նախագահ Լևոն Տեր-Պետրոսյանի հետ: Ըստ էության, Ադրբեջանը Փաշինյանին որոշակի դադար է տվել: Այժմ էլ սահմաններում հարաբերական հանդարտություն է: Բայց այս ամենը թվացյալ հանդարտություն է: Ինչ-որ պահից սկսած Բաքուն կարող անցնել «հարձակման»՝ թե՛ դիվանագիտական ճակատում, թե՛ սահմաններում՝ դիվերսիոն գործողություններով ու որոշակի լարման փորձերով: Հայաստանում ներքաղաքական իրավիճակը, ավելի ճիշտ հասարակության մեծ վստահությունը Փաշինյանի նկատմամբ Բաքվի համար գործոն է՝ Արցախյան հարցում միասնական դիրքորոշման առումով: Սա գիտակցում է Ալիևը: Հայաստանում առկա է մի մթնոլորտ, որը Ադրբեջանում, եթե կա՝ ապա ահի ու սարսափի սպառնալիքի ներքո: Ադրբեջանական հասարակությունը Արցախի վերադարձի մասին մտածում է, որովհետև այդպիսին է Ալիևի իշխանության պետական քարոզչությունը: Հայկական կողմի հետ լեզու գտնելու, զիջումների գնալու հարց երբեք այդ հասարակության հետ չի քննարկվել: Հետևաբար, ադրբեջանական հասարակությունն ինչ-որ առումով զոհ է, քանի որ ընկել է Ալիևի լարած ծուղակը: Հայաստանում, սակայն, ֆորսմաժորային իրավիճակներում՝ Բաքուն կարող է գործել: Միակ հույս Մոսկվայի վրա դրած Ալիևը կարող է քարտ-բլանշ ստանալ կարճատև նոր պատերազմներ հրահրելու: Ի դեպ, օրերս Ադրբեջանում Ռուսաստանի դեսպան Միխայիլ Բոչարնիկովը ոչ ավել, ոչ պակաս հայտարարել է, թե կարծում է, որ Արցախի հիմնախնդրի շուրջ բանակցային գործընթացում ներկայում որոշակի տեղաշարժ կա, դա վերաբերում է կողմերի՝ միմյանց հետ ավելի լավ ծանոթանալուն։ Նրա խոսքով՝ Ռուսաստանի դիրքորոշումն այս հարցում բոլորին քաջ հայտնի է։ «Մոսկվայի նպատակն է աջակցել հակամարտության կողմերին համաձայնության գալու հարցում», ասել է դեսպանը։ Նա շեշտել է, որ ռուսական կողմը հարցին մոտենում է ԵԱՀԿ Մինսկի խմբի պրիզմայի միջոցով՝ հանդիսանալով Մինսկի խմբի համանախագահներից մեկը։ Դիվանագետի կարծիքով՝ հակամարտության շուրջ բանակցային գործընթացի վրա դրական ազդեցություն են ունեցել նաև հոգևոր առաջնորդների կոչերը. «Ես ցանկանում եմ նշել, որ մեր երկրների հոգևոր առաջնորդների կոչերը նույնպես նպաստել են հակամարտության կարգավորմանը»։ Թամար Բագրատունի
Հետևեք մեզ Viber-ում
