Նարինե Թուխիկյանը ևս կլինի ՔՊ ցուցակում

Primenews.am-ի հավաստի տեղեկություններով՝ «Քաղաքացիական պայմանագիր» կուսակցության ավագանու ցուցակում լինելու է Հովհ. Թումանյանի տուն-թանգարանի տնօրեն Նարինե Թուխիկյանը։ Primenews.am-ի հետ զրույցում տեղեկությունը հաստատեց նաև Նարինե Թուխիկյանը։ Չնայած նա անկուսակցական է, բայց համաձայնել է լինել ՔՊ ցուցակում, որովհետև կարծում է, որ իսկապես իրավիճակ է փոխվել։ «Մինչև հիմա ժամանակ առ ժամանակ տարբեր կուսակցություններից առաջարկներ եմ ունեցել մասնակցել ընտրություններին, բայց երբեք չեմ համաձայնել։ Սա առաջին անգամն է, որ նման քայլի եմ գնում, որովհետև համոզված եմ, որ շատ բան կարելի է շտկել։ Իմ մասով կարծում եմ՝ ես էլ կկարողանամ օգուտ բերել»,- ասաց նա։ Հարցին՝ հենց Նիկոլ Փաշինյանին ու նրա թիմին եք հավատում, որ հենց իրենց կուսակցության առաջարկն ընդունեցիք, Նարինե Թուխիկյանն ասաց, որ հավատում է Հայաստանի հասարակությանն ու բնակչությանը։ «Սա հասարակական հիմունքներով աշխատանք է և ես մտավախություն չունեմ, որ իմ անունը կկապվի այս կամ այն կուսակցության հետ։ Արդյունքն ու աշխատանքն է կարևոր՝ թե ում հետ ինչ կկապեն։ Էականն այն է, թե ինչ պետք է անես, ինչ պետք է առաջարկես և ինչ պետք է փոխես՝ ոչ միայն այս թիմով, այլև բոլոր նրանց հետ, ովքեր կհայտնվեն ավագանիում։ Հուսով եմ՝ ընդհանրական նպատակ կձևավորվի Երևանի համար»,- ասաց նա։ Հիշեցնենք, որ ՔՊ ցուցակը գլխավորելու է դերասան Հայկ Մարությանը։