Պատասխանել «դաշնակիցներին», եթե պատերազմ են հրահրում

Ադրբեջանը, հավանաբար, ստացել է «Պոլոնեզների» նոր խմբաքանակ Բելառուսից: «Պոլոնեզ» համազարկային կրակի ռեակտիվ համակարգերի նոր խմբաքանակ ստանալու մասին կարելի է եզրակացնել 2018 թ․ հուլիսի 26-ին արված արբանյակային լուսանկարի ուսումնասիրությունից: Լուսանկարում Ադրբեջանի ԶՈւ «Նասոսնի» ավիաբազայում երևում է մեկ Իլ-76 և մեկ Իլ-62 բեռնատար ինքնաթիռներ: Ինքնաթիռների կողքը ավտոմեքենա է, որի վիզուալ առանձնահատկությունները և չափերը համընկնում են բելառուսական արտադրության МЗКТ-7930 մեքենայի չափերին։ Այն օգտագործվում է որպես շասսի օրինակ՝ «Իսկանդեր» ՕՄՀՀ և «Պոլոնեզ» ՀԿՌՀ համար: Ենթադրում ենք, որ այս պարագայում լուսանկարներում երևացող տեխնիկան հենց «Պոլոնեզ» է: Ըստ «Ռազմ.ինֆո»-ի՝ լուսանկարից դժվար է հասկանալ՝ այդ տեխնիկան «Պոլոնեզի» արձակման մեքենա՞ն է, թե՞ տրանսպորտալիցքավորող մեքենան: Դրա կողքին կա նաև բեռնատար մեքենա իր քարշակվող մասով: Պարբերականի փոխանցմամբ՝ Բելառուսից մատակարարման վարկածը անուղղակիորեն հաստատվում է նաև հետևյալ փաստով․ Ադրբեջանը չունի Իլ-62 ինքնաթիռներ, միաժամանակ Բելառուսում Իլ-62 ինքնաթիռի բեռնատար տարբերակով ծառայություններ է մատուցում Rada Airlines ընկերությունը: «Ինչպես պարզեցինք, Rada Airlanes-ի EW-450TR Իլ-62 ինքնաթիռը հուլիսի 26-ին իսկապես ժամանել է «Նասոսնի» ավիաբազա, նույն օրը՝ երբ արվել էր արբանյակային լուսանկարը: Այսինքն՝ արբանյակային լուսանկարում եղած Իլ-62-ը, շատ մեծ հավանականությամբ, հենց EW-450TR բեռնատար ինքնաթիռն էր: Նշենք նաև, որ հուլիսի 26-ի թռիչքը միակը չէր, և ամռան ընթացքում նույն ինքնաթիռը մի քանի անգամ եղել է Ադրբեջանում: Ինչ վերաբերում է երկրորդ ինքնաթիռնին՝ Իլ-76-ին, ապա դրա «ինքնությունը» առայժմ պարզել չկարողացանք», գրել է կայքը: Հարկ է հիշեցնել, որ Ադրբեջանում «Պոլոնեզների» առկայության մասին առաջին անգամ հայտնի դարձավ այս տարվա հունիսի 11-ին, երբ Ադրբեջանի նախագահը այցելեց հրթիռային նոր զորամաս: Այն ժամանակ երևացել էր «Պոլոնեզի» արձակման 3 մեքենա: Հետագայում, արբանյակային լուսանկարների լրացուցիչ ուսումնասիրությունից պարզ դարձավ, որ նշված միջոցները Ադրբեջանում եղել են առնվազն մինչև մայիսի 30-ը: Մոտ մեկ շաբաթ հայտնի դարձավ, որ ՀՀ նախագահ Արմեն Սարգսյանի հրամանագրերով` Օլեգ Եսայանը հետ է կանչվել Բելառուսում Հայաստանի դեսպանի, ինչպես նաև Անկախ պետությունների համագործակցության կանոնադրական և այլ մարմիններում Հայաստանի մշտական և լիազոր ներկայացուցչի պաշտոններից: Նախագահի այլ հրամանագրերով` այդ պաշտոններում նշանակվել է Արմեն Ղևոնդյանը։ Հայաստանի գործընկերներն, ըստ Փաշինյանի հնչեցրած գնահատականի՝ պետք է ադապտացվեն նոր Հայաստանին: Նշանակում է, հայաստանյան նոր իրողությունները պետք է ընկալելի դառնան նաև արտաքին ճակատում՝ «դաշնակիցների» շարքում: Այս կամ այն կառույցում՝ Հայաստանի դաշնակիցներից շատերն այս տարիների ընթացքում ապացուցել են, որ առավելապես Ադրբեջանի շահերն են պաշտպանում: Դա արել են բաց: Այդ երկրներից Հայաստանը չի կարող պահանջել Ադրբեջանի հետ հարաբերությունների խզում, սա հասկանալի է: Բայց կարող է պահանջել գոնե որոշակի չեզոքության դրսևորում: Ավելին՝ խոսքը գնում է Ադրբեջանին պատերազմի դրդելուն, նպաստելուն: Այստեղ կարմիր գիծ կա, որը չպետք է անցնեն գոնե Հայաստանի դաշնակից համարվող երկրները: Մետաքսյա Շալունց