«Թույլ տվողն» էլ հավանաբար ինքն է

Ազգագրագետ Հրանուշ Խառատյանը ֆեյսբուքյան իր էջում գրել է․ Հավանաբար պետք է երախտապարտ լինել Ուկրաինայում ՀՀ դեսպանի պաշտոնը զբաղեցնող պարոն Անդրանիկ Մանուկյանին, ով երիտասարդների կողմից ծերակույտին հաղթանակած հեղափոխությունից հետո գտնում է․ «․․․այժմ Հայաստանում որակապես այլ իրավիճակ է, և ես անկեղծորեն կարծում եմ, որ եկել է ժամանակը թույլ տալու երիտասարդներին աճել ու կայանալ»: «Թույլ տվողն» էլ հավանաբար ինքն է և վերջին քսան տարիներին Հայաստանի երիտասարդներին ա/Ավագյան ազգանունով վարչարարի փուչիկներով գայթակղելով նվաստացնելու, բ/ համարձակներին և ինքնուրույններին փողոցային ցույցերին ծեծելու, բանտարկելու, գ/խոպաններ քշելու քաղաքականության թևի ներկայացուցիչն, ըստ երևույթին, մեծահոգաբար թույլատրում է «աճել և կայանալ»: Ինչպես չհիանալ ներքին խնդիրներում խիստ փորձառու դիվանագետի «թույլտվողական» այս կողմնորոշմամբ, ճիշտ է՝ մի փոքր ուշացած և առանց իր թույլտվության «աճած և կայացածներին» դեռ վերջերս նախատող դիրքերը զիջելու պատրաստակամությամբ: Մարդը նույնիսկ որոշել է հրաժարվել արտաքին դիվանագիտական աշխատանքից՝ հավանաբար ներսում տեղավորվելու փորձառությունը կիրառելու համար: Հիրավի՝ «․․․այժմ Հայաստանում որակապես այլ իրավիճակ է» և ճիշտ ժամանակն է նրա հարուստ կենսափորձն օգտագործել երիտասարդների աճին ու կայացմանը նպաստելու շնորհակալ գործում։