«Ամեն ինչ աչքաչափի վրա է». այս տարի Սեւանա լճից մինչև 40 մլն խմ լրացուցիչ ջրառ կիրականացվի

Իր խոսքում Փաշինյանն ասաց. «Մեր խնդիրն է մաքսիմալը անել, որ Սեւանա լջից լրացուցիչ 40 մլն խմ ջրառ կազմակերպելուն բանը չհասնի: Դեռ հունիսին խնդիր էր դրվել ամեն ինչ անել, որ հավելյալ ջրառ իրականացնելու անհրաժեշտություն չլինի, հետո զեկուցվել է, որ նման անհրաժեշտություն չի լինի, այնուհետեւ՝ որ կլինի, եւ այսպես շարունակ: Կառավարությունում մի քանի քննարկումներ են տեղի ունեցել, եւ քննարկման ժամանակ իրավիճակ ունեինք, երբ քննարկման մասնակիցները երկու մասի էին բաժանվել. մի մասը պնդում էր, որ հնարավոր է ոռոգման կարիքները բավարարելն առանց Սեւանից ջրառ իրականացնելու, իսկ մյուս մասը պնդում էր, որ դա հնարավոր չէ, եւ եթե գնանք այդ ճանապարհով, կկանգնենք աղետի առաջ, որովհետեւ կպարզվի, որ գյուղացիների այգիները, որոնք աննախադեպ բերքի են սպասում, կկանգնեն աղետի առջեւ»,- կառավարության նիստում «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին» նախագծի քննարկման ժամանակ նշեց ՀՀ վարչչապետ Նիկոլ Փաշինյանը: Նշենք, որ այդ նախագծով նախատեսվում է Սեւանա լճից ջրառի չափը 2018 թվականի համար 170 մլն խմ-ից դարձնել մինչեւ 210 մլն խմ: Վարչապետը նշեց, որ այսպիսով եկան հետեւյալ մոտեցման, որ այսպիսի որոշում կայացնեն, բայց կստեղծեն նաեւ օպերատիվ խումբ, որն անգամ օրենքի ընդունման պարագայում կուսումնասիրի վիճակը եւ կփորձի իրավիճակը կառավարել այնպես, որ եթե կա որեւէ գործնական հնարավորություն ոռոգման խնդիրը լուծել առանց այս 40 մլն խմ-ին կպնելու, այդ խնդիրը լուծենք: Բայց այնպես անենք, որ եթե պարզվի, որ բերքը ոչնչանում է, մենք այնուամենայնիվ, այդ ջրառն իրականացնենք»: Նիկոլ Փաշինյանը հարց բարձրացրեց, թե ջրի այդ պահանջարկը ինչպես է ձեւավորվում. «Արդյոք դա ապացուցելի է, եւ պարզ է դառնում, որ ամեն ինչ աչքաչափի վրա է, եւ սա կատաստրոֆիկ համակարգ է, ու չես հասկանում, թե ինչպես է աշխատում»: Նա հանձնարարեց փոխվարչապետ Տիգրան Ավինյանին համատեղ վերահսկողություն իրականացնել: «Մեր խնդիրն է մաքսիմալը անել, որ այդ 40 մլն խմ ջրին չկպչենք: Կամ մինչեւ 25 մլն խմ-ի շրջանակում կարողանանք կազմակերպել ջրառը, եւ այդ 25+15 խմ-ն դիտարկում ենք պոտենցիալ գյուղատնտեսական աղետից խուսափելու ռեզերվ»,- ընդգծեց վարչապետը: