« Բրանսոնին ազատ արձակելու ԱՄՆ-ի պահանջներն անընդունելի են»․ Էրդողանի խոսնակ

Թուրքիայում կալանավորված ամերիկացի հոգևորական Էնդրյու Բրանսոնին ազատ արձակելու Միացյալ Նահանգների պահանջներն անընդունելի են: Այդ մասին հայտարարել է Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալընը, գրում է gazeteduvar.com.tr կայքը։ «Թուրքիան օրենքի երկիր է, և քահանա Բրանսոնի գործի վերաբերյալ իրավական գործընթաց է ընթանում, այդ իրավական գործընթացներն արհամարհելով մի շարք պահանջներ ներկայացնելը, անշուշտ, անընդունելի է։ Ուշադրություն դարձրեք, յուրաքանչյուր առիթով Թուրքիայում և այլ երկրներում արդարադատության համակարգի անկախության վերաբերյալ խորհուրդներ տվող ԱՄՆ-ն այժմ կամայական մեկնաբանություններ ու պահանջներ է հնչեցնում ընթացքի մեջ գտնվող մի դատական գործընթացի վերաբերյալ»,- ասել է Քալընը։ Էրդողանի խոսնակը նաև ընդգծել է, որ Բրանսոնի հոգևորական լինելը նրա անմեղ լինելու մասին վկայել չի կարող։