Անգելա Մերկելը Վրաստանում առաջինը կհանդիպի վարչապետին

Գերմանիայի կանցլեր Անգելա Մերկելն իր պաշտոնական այցը Վրաստան կսկսի վարչապետ Մամուկա Բախտաձեի հետ հանդիպմամբ: Այդ մասին, ինչպես տեղեկացնում Է «Արմենպրես»-ը, հայտնել Է «Գրուզիա Online»-ը: Մերկելը երկօրյա պաշտոնական այցով Թբիլիսի կժամանի օգոստոսի 23-ին: Գերմանիայի կանցլերին Թբիլիսիի միջազգային օդանավակայանում կդիմավորի Վրաստանի արտաքին գործերի նախարար Դավիթ Զալկալիանին, ինչից հետո կկայանա ընդունելության պաշտոնական արարողությունը կառավարության վարչակազմում: Անգելա Մերկելը Մամուկա Բախտաձեի հետ հանդիպում կանցկացնի ինչպես դռնփակ, այնպես Էլ ընդլայնված ձեւաչափով: Այցի առաջին օրը կկայանա նաեւ Անգելա Մերկելի եւ Վրաստանի նախագահ Գիորգի Մարգվելաշվիլիի հանդիպումը: Օգոստոսի 23-ին պաշտոնական ճաշկերույթ կտրվի վարչապետ Բախտաձեի անունից: Մերկելը հանդիպումներ կանցկացնի նաեւ այցի երկրորդ օրը՝ օգոստոսի 24-ին: Պլանավորված են Գերմանիայի կանցլերի հանդիպումներն ընդդիմության ներկայացուցիչների եւ «Արժանի գործընկեր» զորավարժությունների մասնակից գերմանացի զինվորների հետ: