Աշխարհի ոչ մի վերլուծական կենտրոն չէր կանխատեսել, որ ՀՀ-ում կարող է տեղի ունենալ այսպիսի ժողովրդական զարթոնք

100 օր առաջ հայ ժողովուրդը հաղթանակեց։ 100 օր առաջ և ձեր կամքով, ձեր որոշմամբ ես ընտրվեցի Հայաստանի Հանրապետության վարչապետ: Այդ մասին այսօր՝ օգոստոսի 17–ին, պաշտոնավարման 100 օրն ամփոփող հանրահավաքի ժամանակ ասաց վարչապետ Նիկոլ Փաշինյանը։ «Հաղթանակն այն է, որ դուք եք որոշել՝ ով լինի Հայաստանի Հանրապետության վարչապետ և սրանից հետո, ընդմիշտ, դուք եք որոշելու, թե ով լինի Հայաստանի վարչապետ։ Աշխարհի ոչ մի վերլուծական կենտրոն չէր կանխատեսել, որ Հայաստանի Հանրապետությունում կարող է տեղի ունենալ այսպիսի ժողովրդական զարթոնք։ Բոլորը ելնում էին այն կանխավարկածից, որ Հայաստանը վերջնականապես հանձնվել է հուսահատության առաջ։ Նաև այդ պատճառով է տեղի ունեցածը բացառիկ։ Հայաստանի պատմության մեջ դեռ չի եղել նախադեպ, երբ խորհրդարանական ընտրություններից մեկ տարի անց երկրի վարչապետ ընտրվի մեկը, ով խորհրդարանում ունի ընդամենը մի քանի վստահելի ձայն և այս ամենը իրականություն դառնա առանց մի կրակոցի, բռնության և զոհի։ Հիմա աշխարհի վերլուծաբանները ջանք չեն խնայում հասկանալու, թե որն է այն գործոնը, այն հզոր ուժը, որ հնարավոր դարձրեց իրադարձությունների նման զարգացումը։ Ոմանք այդ գործոնները փնտրում են Արևմուտքում, ոմանք՝ Հյուսիսում, բայց հիմա այս ամբիոնից ուզում եմ ի լուր աշխարհի ասել, որ բացառիկ և հզոր այն ուժը, որ հնարավոր դարձրեց այդ իրադարձությունը հայ ժողովուրդն է»,-ասաց նա: