Հինգերորդ շարասյունը շարժման մեջ է
Քաղաքագետ Լեւոն Շիրինյանի կարծիքով Ռուսաստանի արտգործնախարար Սերգեյ Լավրովի հայտարարությունը ուղղակի միջամտություն է Հայաստանի ներքին կյանքին.«Հայաստնում զանգվածային լուստրացիա է՝ լավրովյան հրամանով և լավրովյան կամքով: Լուստրացիան խորհրդարանում է, կուսակցությունների շարքում, կայքէջերում, լրագրության մեջ, անհատապես: Նայեք և դուք կտեսնեք: Հինգերորդ շարասյունը շարժման մեջ է: Սակայն հեղափոխության հաղթական երթն անկասելի է; Հայաստանը յոթ մղոնանոց քայլերով գնում է ընդառաջ իր լուսավոր ապագային»: Քաղաքագետը մեզ հետ զրույցում նկատեց, թե Ռուսաստանին թվում էր՝ նոր իշխանությունները քրեաօլիգարխիկ համակարգի ամենավերին օղակներին չեն հասնելու, վենդետա չի լինելու եւ հիմա երկրորդ նախագահ Ռոբերտ Քոչարյանի կալանավորումը նրանց գցել է ցայտնոտի մեջ: Հիշեցնենք, որ Լավրովը խոսելով հայաստանյան ներքաղաքական գործընթացների մասին դժգոհություն է հայտնել, ասելով, որ Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։ « Ռուսաստանը կարծես ապահով էր իրեն զգում, կարծում էր, թե նոր իշխանությունները գլխավորներին ձեռք չեն տա: Հիմա, երբ հասկանում են, որ քրեաօլիգարխիկ հատվածն ի դեմս Քոչարյանի գլխատվում է, չի բացառվում վաղն էլ՝ հանձին Սերժ Սարգսյանի : Հետեւապես Հայաստանը հնարավորություն է ստանում ավելի ուժեղ պետություն դառնալ, ինքնուրույն լինելու, ինչն իրենց համար առանձնապես ուրախալի չէ>>: Քաղաքագետն ասում է, որ այդուհանդերձ Ռուսաստանից վախենալ պետք չէ, հարկավոր է արժանի պատասխան տալ՝ հիշեցնելով, որ Հայաստանը իրավական պետություն է, որտեղ անգամ նախկին նախագահները պետք է պատասխնատվության ենթարկվեն.<<Իսկ Քոչարյանը իշխանության յուրացում է կատարել, ինչը այլ պետություններում, օրինակ Հարավային Կորեայում օրենսդրությամբ մահապատժով են պատժում>>: Շիրինյանի կարծիքով համեմատելի չեն առաջին եւ երկրորդ նախագահների արարքները,մասնավորապես.<<1995-ին , այո, Տեր-Պետրոսյանը արել է, բայց Մարտի 1-ը եւ տասը զոհերը ավելի ծանր է նստել ժողովրդի վրա, քան սեպտեմբերյան խեղաթյուրումները: Բացի դրանից Տեր-Պետրոսյանը տնտեսությունն այնքան չէր հոշոտել, ինչքան հոշոտեց Քոչարյանը: Տարօրինակ է, որ ոչ մեկ ոչ դրսում, ոչ ներսում չի հարցնում՝ Քոչարյանի փողերը որտեղից, Սերժի մարիխուանայի փողերը որտեղից: Տեսան չէ, որ ոսկեզօծ դռներ ու վերելակներ ունեն>>: Խոսելով Քոչարյանի կալանավորմանը կուսակցությունների արձագանքի մասին, քաղաքագետը երկրորդ նախագահին աջակցության հայտնած ՀՀԿ-ին ու ՀՅԴ-ին որակեց իբրեւ գողապետության աջակիցներ, իսկ չեզոքություն պահպանող Բարգավաճ Հայաստանի մասին ասաց.<<ԲՀԿ-ն չի միանում ռեակցիային եւ ավելի խելամիտ է, կփրկի, թե չի փրկի պատասխանատվությունից, դա իրավագետները պետք է ասեն>>: Նոր իշխանությունների կողմից Արցախի հարցում տերպետրոսյանական ծրագիրն իրագործելու եւ ազատագրված տարածքները Ադրբեջանին հանձնելու վերջին օրերի քննարկումները Շիրինյանի կարծիքով շրջանառության մեջ են դրվել ռուսական գաղտնի ծառայությունների կողմից.<<Այդպիսի բան չկա, չի կարող լինել ու չի լինել, որովհետեւ վարչապետ Փաշինյանը Հայաստանի դիրքորոշումը հստակ հայտարարել է, որ Հայաստանը չի բանակցելու Արցախի փոխարեն, եթե չի բանակցելու, ոնց է հանձնելու>> : Անի Սահակյան
Հետևեք մեզ Viber-ում
