Ռոբերտ Քոչարյանին 10-ը տարի հետևողականորեն «փչացնելուց» հետո ՀՀԿ-ն արթնացավ

Հանրապետական կուսակցությունը երկրորդ հայտարարությունն է տարածել Ռոբերտ Քոչարյանի կալանավորման առիթով՝ դարձյալ մտահոգություն հայտնելով, խոսելով հասարակության պառակտման մասին և հայտարարելով, որ հարցը բարձրացնելու է միջազգային կառույցներում: Երկրորդ հայտարարությունն անհամեմատ կոշտ է, քան առաջինը, այստեղ մասնավորապես ասվում է.<<Այս գործընթացը որեւէ աղերս չունի ժողովրդավարության, իրավունքի գերակայության եւ դատական իշխանության անկախության հետ։ Հարուցված գործը խորապես վնասելու է Հայաստանի Հանրապետության ներքաղաքական զարգացումներին։ Նման անհիմն մեղադրանքով երկրում խրախուսվում են հասարակական պառակտման միտումները, որոնք առավել վտանգավոր են դառնում Հայաստանի եւ Արցախի շուրջ ձեւավորված խիստ մտահոգիչ մարտահրավերների ֆոնին>>։ Կուսակցությունը կոչ է հղում ՀՀ Հատուկ քննչական ծառայությանը, դատախազությանը եւ ՀՀ դատարաններին պատշաճ կերպով երաշխավորել ՀՀ Սահամանդրության դրույթները եւ առաջնորդվել բացառապես ՀՀ Սահմանադրության, ՀՀ օրենքների եւ միջազգային պայմանագրերի պահանջներով եւ կարգավորումներով: ՀՀԿ խմբակցությունն այս հարցի եւ նրա շուրջ զարգացումների մասին բարձրաձայնելու է նաեւ խորհրդարանական դիվանագիտության խողովակներով՝ միջազգային համապատասխան հարթակներում եւ ձեւաչափերով։ Հայտարարությունը հետաքրքրական է այն առումով, որ Քոչարյանի աշտպանությունը ստանձնում է ՀՀԿ-ն, որը Սերժ Սարգսյանի գլխավորությամբ տասը տարի փոխհրաձգության մեջ էր Ռոբերտ Քոչարյանի հետ, ով իշխանության վերադառնալու հավակնություններ ուներ, բայց ՀՀԿ-ն կենաց-մահու պայքարով փակեց նրա դեմ բոլոր ճանապարհները: Եւ հիմա ինչն է ՀՀԿ-ին ստիպում ստանձնել մի մարդու պաշտպանությունը, որը ոչ վաղ անցյալում Սերժ Սարգսյանի իշխանության ամենաառանցքային սպառնալիքն էր ՀՀԿ-ում ունեցած ստվերային ազդեցության եւ որոշակի լծակների շնորհիվ: Ի դեպ, այդ մասին Քոչարյանը տարբեր առիթներով չի վարանել խոստովանել, որ ՀՀԿ-ում ունի իր այսպես կոչված ֆրակցիան: Հուլիսի 26-ի իր հարցազրույցում Քոչարյանը բազմիցս ակնարկեց, թե չի պատրաստվում միայնակ խորտակվել, մեկ օր հետո նույնը կրկնեց իր գրասենյակի ղեկավարը, փաստաբանները: Ըստ ամենայնի ՀՀԿ-ում հասկացել են, որ օղակը սեղմվելով հասնելու է սեփական պարանոցին, որովհետեւ հեռացող նախագահ Քոչարյանը մեծ հաշվով որեւէ շահ չպետք է ունենար սահմանադրական կարգի խախտման ու իշխանություն պահելու տեսանկյունից, դրան գնացել է հանուն Սերժ Սարգսյանի իշխանության Դրանից բացի, հետհեղափոխական ջախջախված ՀՀԿ-ի համար սա լավագույն շանսն է աշխարհին Քոչարյանի քողի ներքո ներկայանալու քաղհալածյալի կերպարանքով ու ասելու, որ նոր իշխանությունները պառակտում են հասարակությանը, թքում Սահմանադրության եւ իրավակարգերի վրա՝ որոշակի դիվիդենտներ շահելու ակնկալիքով: Իսկ եթե զուտ Քոչարյանին աջակցության մասին մտածեին, ապա մինչ օրս եւ այսուհետ ՀՀԿ-ն պետք է բոլոր հարթակներով բարձրաձայներ Քոչարյանի պաշտպանության հարցը, ինչն, անշուշտ, մենք չենք տեսնում: Անի Սահակյան