«Ամեն ինչ տգեղ է». Ժաննա Գալստյանը Քոչարյանի ձերբակալության մասին

Արցախի ԱԺ պատգամավոր, Արցախի հերոս ԺԱՆՆԱ ԳԱԼՍՏՅԱՆԸ «Իրավունքի» հետ զրույցում անդրադառնալով ՀՀ երկրորդ նախագահ Ռոբերտ Քոչարյանի ձերբակալությանը փաստեց, որ չի հասկանում, թե ինչ գործելաոճ է որդեգրել ՀՀ ղեկավարարությունը. «Դժվարանում եմ հասկանալ, թե ինչ է կատարվում, այս ամենը տրամաբանությունից դուրս է: Ես չեմ կարող խոսել ՀՀ նախագահ Ռոբերտ Քոչարյանի մասին, բայց կարող եմ խոսել այն Ռ. Քոչարյանի մասին, ով եղել է Արցախի ղեկավարը, դարձել մեր ամբողջ հաղթանակի մի մասնիկը: Ի վիճակի չեմ այս ամենը վերլուծել, որովհետեւ ամեն ինչ ակնհայտ տգեղ է»,-նշեց Ժ. Գալստյանը: Ըստ նրա, ՀՀ նոր իշխանությունները հայտարարել էին, թե իրականացնելու են սիրո եւ համերաշխության հեղափոխություն, սակայն իրենց քայլերով ապացուցում են ճիշտ հակառակը, նրանց քայլերն իրենց խոսքերին հակասում են: Ինչ վերաբերում է ՀԱՊԿ գլխավոր քարտուղարի Յուրի Խաչատուրովի ձերբակալությանը, Ժաննա Գալստյանը նկատեց, որ այս ամենը խիստ կազդի ՀՀ հեղինակության վրա. «Այլ բան չեմ կարող ասել, պարզապես ցնցված եմ: Հուսանք, այս ամենը մեր ստեղծածի հիմքերը չի խախտի»,-եզրափակեց Ժ. Գալստյանը: