«Խաբված եմ եղել». Ալիկ Սարգսյանը՝ ՀՀԿ գործելաոճի մասին

ՀՀԿ-ական պատգամավոր, նախկին  ոստիկանապետ Ալիկ Սարգսյանն այսօր Հայելի ակումբում լրագրողների հետ հանդիպման ժամանակ հայտարարեց, որ էլ քաղաքականությամբ չի զբաղվելու։ «Ես հիմա քաղաքականությամբ չեմ զբաղվում, պատրաստվում եմ ընդհանրապես չզբաղվել։ Ես բավարարված եմ այս ամենից, ինչ տեսա, հիասթափված եմ վերջնականորեն, ու որևէ կուսակցության ջրաղացին ջուր լցնել չեմ պատրաստվում։ Այն, որ ԱԺ-ից թողնելու եմ դուրս գամ, դա միանշանակ է, չեմ մնալու, ինձ էդ մանդատը պետք չէ, ես չեմ պատրաստվում նոր իշխանությունների հետ ինչ-որ պատմություն ստեղծել զուտ այն պատճառով, որ նոր իշխանություններ են, ժողովուրդը ոգևորված է, ու պետք է օգնենք, որ նոր իշխանությունները կայանան»,- նշեց Ա. Սարգսյանը։ Ինչպես նշեց՝ ինքը ևս երկար ժամանակ խաբված է եղել: «Խաբված եմ եղել, որ հավատացել եմ մեր կուսակցության կուրսին, որ մեր կուսակցությունը զբաղված է էն բանով, որ երկիրը ծաղկի»,- ասաց նա՝ չցանկանալով մանրամասնել: