Ո՞վ է «Էրեբունի» ԿԲ-ի մոտակայքում կրակոցների հեղինակը. ՔԿ-ն պարզել է անձի ինքնությունը

ՀՀ քննչական կոմիտեի Երեւան քաղաքի քննչական վարչության Էրեբունի եւ Նուբարաշեն վարչական շրջանների քննչական բաժնում զենքի գործադրմամբ խուլիգանության դեպքի առթիվ քննվող գործով ձեռնարկված անհրաժեշտ քննչական եւ դատավարական այլ գործողությունների արդյունքում պարզվել է ենթադրյալ հանցագործություն կատարած անձի ինքնությունը, ով ներգրավվել է որպես կասկածյալ: Ինչպես հայտնում են ՔԿ-ի մամուլի ծառայությունից, 2018թ. հուլիսի 23-ին «ձախ զստային շրջանի հրազենի վնասվածք, տրավմատիկ շոկ» ախտորոշմամբ «Էրեբունի բժշկական կենտրոն» ՓԲԸ բուժօգնության էր դիմել Երեւանի բնակիչը՝ ծնված 1991թ.: Դեպքի առթիվ Էրեբունի եւ Նուբարաշեն վարչական շրջանների քննչական բաժնում հարուցված քրեական գործով ձեռնարկված միջոցառումների արդյունքում պարզվել են քրեական գործով էական նշանակություն ունեցող հանգամանքները, այդ թվում՝ վիճաբանության շարժառիթը, ենթադրյալ հանցագործություն կատարած անձի ինքնությունը, ով ներկայացել է վարույթն իրականացնող մարմնին եւ ցուցմունք տվել դեպքի շուրջ, հանձնել հանցագործության գործիք հանդիսացած տրավմատիկ փամփուշտներ կրակող զենքը։ Հիշեցնենք, որ դեպքի վայրի զննությամբ հայտնաբերվել էր 9 մմ տրամաչափի 3 պարկուճ, որոնք, փորձագետի նախնական դիտարկման համաձայն, հանդիսանում են ատրճանակի տրավմատիկ պարկուճներ: Քրեական գործով նշանակվել են դատաբժշկական եւ դատաքրեագիտական փորձաքննություններ։ Նախաքննությունը շարունակվում է: