Սիմվոլների լեզուն՝ Արմեն Սարգսյանի ու Նիկոլ Փաշինյանի հանդեպ

Հայաստանի նախագահ Արմեն Սարգսյանի և վարչապետ Նիկոլ Փաշինյանի նկատմամբ միջազգային հանրության վերաբերմունքը սկսում է ավելի ու ավելի ակնառու դառնալ: Թեև փոքր թվացող խորհրդանշանական քայլերով, մի տեսակ, նկատելի է, որ Փաշինյանն առայժմ դեռ չի ընկալվում որպես երկրի առաջնորդ: Ինչ-որ առումով դա բնական վերաբերմունք է. նա նոր է վարչապետ ընտրվել, նոր է քաղաքական թիմ ղեկավարում, նոր է երկրի առաջնորդի պաշտոնում: Այստեղ պարզապես հետաքրքրական է, որ հատկապես Մոսկվան է ցուցադրում վերաբերմունքը Փաշինյանի նկատմամբ: Օրերս Հայաստանի նախագահ Արմեն Սարգսյանը Մոսկվայի «Լուժնիկի» մարզադաշտում դիտում էր ֆուտբոլի աշխարհի առաջնության փակման արարողությունը, ապա հետևել էր եզրափակիչ՝ Ֆրանսիա-Խորվաթիա խաղին: Հայաստանի նախագահի գրասենյակի և համացանցում հայտնված այլ լուսանկարներից պարզ է դառնում, որ Արմեն Սարգսյանի կողքին նստած էր Ռուսաստանի վարչապետ Դմիտրի Մեդվեդևը: Իսկ որտե՞ղ էին նստեցրել Նիկոլ Փաշինյանին և տիկնոջը հունիսի 14-ին Մոսկվայում ֆուտբոլի աշխարհի առաջնության բացման արարողությանը... Երրորդ հարկում, Պուտինից ու Մեդվեդևից հեռու: Մինչդեռ Ադրբեջանի նախագահն իր ընտանիքով՝ Պուտինին բավական մոտ էին նստած: Իհարկե, Փաշինյանը հասցրել է այս ընթացքում երկու անգամ հանդիպել թե՛ Պուտինին, թե՛ Մեդվեդևին: Բայց դրանք, կարծես ճանաչողական հանդիպումներ էին, թեև Փաշինյանն ու իր կառավարությունն ամեն ինչ անում են, որպեսզի ցույց տան Հայաստանի նոր իշխանության հստակ վերաբերմունքը, ավելի ճիշտ՝ հավատարմությունը Ռուսաստանի նկատմամբ: Ընդ որում, պետք է արձանագրենք նաև Արմեն Սարգսյանն ընկալվում է ոչ միայն Ռուսաստանում, այլև ԱՄՆ-ում: Հիշենք հունիսի վերջին նրա եռօրյա այցը Միացյալ Նահանգներ: Վաշինգտոն կատարած աշխատանքային այցի վերջին օրը Հայաստանի նախագահ Արմեն Սարգսյանը հանդիպեց Ամերիկայի Միացյալ Նահանգների պետքարտուղար Մայք Պոմփեոյի հետ: Այդ զրույցի ընթացքում նախագահ Սարգսյանն ասել էր, որ Հայաստանը կարևորում է հայ-ամերիկյան գործընկերության հետևողական զարգացումը և պետքարտուղարին ներկայացրել է «նոր Հայաստանի» պատրաստակամությունը` շարունակելու ամրապնդել հարաբերությունները Միացյալ Նահանգների հետ։ Նախ՝ այս հանդիպման կազմակերպման անհրաժեշտությունը ամերիկյան վարչակազմին հասցնելն ու ապա դրա կայացումն, արդեն իսկ վկայում էր որոշակի վերաբերմունքի մասին Արմեն Սարգսյանի հանդեպ: Թամար Բագրատունի