Կոռուպցիայի դեմ պայքարը կանգ չի առնելու նույնիսկ իր ընտանիքի անդամների հարցում.վարչապետ
«Ես նույնիսկ իմ ամենասուր ընդդիմադիր ելույթներում ինձ թույլ չէի տալիս համարձակվել մտածել, որ կարող է երկրում վիճակը լինել այնպիսին, ինչպիսին այսօր է, որ կարող է թալանի ծավալը և մակարդակը լինել մեր բոլորի ամենավառ երևակայության սահմաններից անդին: Սա մի իրողություն է, որ մենք այսօր պետք է արձանագրենք»,- լրագրողների հետ հանդիպման ժամանակ ասաց Հայաստանի վարչապետ Նիկոլ Փաշինյանը : Անդրադառնալով Հայաստանում կոռուպցիայի դեմ պայքարին, վարչապետը նշեց, որ այն հասել է մի ծավալի, երբ «սկսում է առնչվել այնպիսի մարդկանց շահերի հետ, ովքեր ծափահարել են տեղի ունեցած հեղափոխությանը»: Նա վերահաստատեց նախկինում արած հայտարարությունը, որ կոռուպցիայի դեմ պայքարը կանգ չի առնելու նույնիսկ իր ընտանիքի անդամների հարցում: «Ես դա ասել եմ ամենայն լրջությամբ և հիմա էլ ասում եմ ամենայն լրջությամբ: Էսօր առավել ևս մյուսները պետք է հասկանան, որ կոռուպցիայի դեմ պայքարը որևէ մեկի հանդիպելիս կանգ չի առնելու»,- հայտարարեց վարչապետը:
Հետևեք մեզ Viber-ում
