Լեւոն Զուրաբյանը 40 հազար դոլար «կպցրեց»

Ազգային ժողովում Ընտրական օրենսգրքի նախագծի շուրջ լսումների ժամանակ ՀԱԿ խմբակցության ղեկավար Լևոն Զուրաբյանն իշխանություններին առաջարկեց իր ընկերոջը 40 հազար դոլար տալ՝ ընտրատեղամասերում տեսանկարահանող սարքավորումներ տեղադրելու և հատուկ կայքով ընտրական գործընթացն ուղիղ հեռարձակելու համար: Նա նշեց, որ դա հնարավորություն կտա վերահսկել ընտրական գործընթացը: Կառավարության աշխատակազմի ղեկավար-նախարար Դավիթ Հարությունյանը համաձայնեց. «Ձեր ընկերոջը կտրամադրենք այդ 40 հազար դոլարը»: «Համաձայն եմ, ես հենց նոր իմ ընկերոջ համար 40.000 դոլար կպցրեցի և պատրաստ եմ դրա համար պատասխանատվություն կրել»,- այսօր Ազգային ժողովում լրագրողների հետ զրույցի ժամանակ նման տեսակետ հայտնեց ԱԺ ՀԱԿ խմբակցության ղեկավար Լևոն Զուրաբյանը: Դիտարկմանը, թե՝ փաստորեն, իշխանությունն ընդառաջ գնաց Ձեր բոլոր առաջարկություններին, ՀԱԿ ղեկավարն ասաց, որ ինքը դեռ վստահ չէ. «Որովհետև դուք տեսնում եք, քանի անգամ ես այդ հարցը բարձրացրել եմ, իրենք ասել են՝ մենք պատրաստ ենք քննարկել: Այնքան պնդեցի իմ առաջարկը, որ իրենք ստիպված էին ասել, որ ընդունում են: Շատ լավ, որ ընդունում են, ուրեմն՝ մնացած երեք խմբակցությունների հետ մենք հիմա կկազմենք մեր ցուցակը, քաղաքացիական հասարակության հետ կբանակցենք, իրենք իրենց ցուցակը թո՛ղ տան: Մենք կներկայացնենք ցուցակն իշխանություններին: Եվ թո՛ղ իրենք կազմակերպեն այդ բանակցությունները: Լա՞վ է: Ի՞նչ եք ակնկալում այդ քննարկումներից: Լայն, հասարակական կոնսենսուսի ձևավորում: Ի՞նչ է տալու այն, որ չկա հիմա: Այս քննարկումների ֆորմատով ստացվում է, որ իրենք գալիս, խելոք-խելոք ներկայացնում են իրենց առաջարկները սեմինարային ֆորմատի նման: Մենք ընդամենը կարողանում ենք մի քանի րոպե խոսել, առաջարկություններ անել, հարցեր տալ, բոլոր այդ հարցերին իրենք պատասխանում են իշխանության բարձունքից: Եվ նաև իրենց իրավունք են վերապահում ինչ-որ բան ընդունել, ինչ-որ բան մերժել»: