«Սանիթեքի» ու «Վեոլիա ջրի» անգործությունից,մինչև «հուսահատության գազելների» հարց
« Աղբահանությամբ զբաղվող «Սանիթեք» ընկերությունն ու ջրամատակարարմամբ զբաղվող «Վեոլիա ջուր» ընկերությունների գործունեությունից այդքան էլ գոհ չենք, տրանսպորտի հարցը՝ «հուսահատության գազելները», պետք է լինեն Երևանի ապագա քաղաքապետի ուշադրության կենտրոնում: ջրամատակարարման թեմայով մի քանի անգամ զբաղվելու առիթ ունեցել եմ և մի քանի անգամ ահազանգերի հիման վրա հանձնարարական եմ տվել, որ զբաղվեն այդ խնդրով: Տեղյակ եմ, որ Երևանում և մարզերում ջրամատակարարման լուրջ խնդիրներ կան: «Վեոլիա ջուրը» փորձում է հավաստիացնել, որ այդ խնդիրները, մասնավորապես, Երևանում հաղթահարվել են, բայց ես տեղյակ եմ, որ այդպես չէ: Ես հանդիպում ունեցա այդ ընկերության տարածաշրջանային տնօրենի հետ: Բավականին լուրջ խոսակցություն տեղի ունեցավ, և ես ասացի, որ բազմաթիվ վերապահումներ ունենք իրենց գործունեության վերաբերյալ, և ես հույս եմ հայտնել, որ ընկերությունը կվերանայի իր գործունեությունը»,- «Ֆեյսբուքի» իր էջի միջոցով ուղիղ հեռարձակմամբ պատասխանելով ջրամատակարարման, իր նկատած աղբահանության և տրանսպորտի խնդրի վերաբերյալ հարցերին՝ ասաց ՀՀ վարչապետ Նիկոլ Փաշինյանը: Կասկածի տեղիք է տալիս նաև այն փաստը, որ մատակարարվող ջրի ծավալում կորստի չափը մեծ է: Դա, երբեմն, պայմանավորում են վատ վիճակում գտնվող համակարգի հետ, բայց ինքը նաև համաձայն է մամուլում և հանրության շրջանում շրջանառվող այն տեսակետին, որ այստեղ կարող են կոռուպցիոն ռիսկեր լինել. «Ունենք խնդիր, որը լրջորեն պետք է քննարկվի: Հիմա այս տարի ջրամատակարարման խնդիրը կապում են պոմպակայանի վթարի հետ և այլն, խոսվում է ամառվա տապի մասին, բայց Հայաստանում և ոչ միայն Հայաստանում, ամառվա տապն ու ձյունը գալիս են «անսպասելի»: Ես Երևանում, երբ տեսում եմ լեփ-լեցուն աղբամանները, հանձնարարում եմ զբաղվել, «Սանիթեքն» ու « Վեոլիա ջուրը» պետք է հասկանան, որ այդքան գոհ չենք իրենց գործունություններից»,ասաց նա: Տրանսպորտի խնդրի վերաբերյալ հարցին ի պատասխան՝ Նիկոլ Փաշինյանն ասաց, որ «հուսահատության գազելները» Երևանում, ցավոք, շարունակում են գործել, և դա Երևանի նոր քաղաքապետի ուշադրության կենտրոնում պետք է լինի, և, իհարկե, մարզային տրանսպորտային ցանցը նորացնելու ծրագիր է մշակվում Կառավարությունում, ընթացքի մեջ են միասնական երթուղային ցանց ներդնելու աշխատանքները:
Հետևեք մեզ Viber-ում
