Տարոն Մարգարյանի սերն ու Փաշինյանի անհանդուրժողականությունը
Երեւանի քաղաքապետ Տարոն Մարգարյանը, ով պաշտոնը զբաղեցնում է 2011 թվականից, հրաժարական ներկայացրեց: Այդ հրաժարականը որքան սպասելի էր, նույնքան էլ անակնկալ, քանի որ Տարոն Մարգարյանը ենթականերին վստահեցրել էր, որ վախենալու ոչինչ չունի ու պատրաստ է <<նստել>>, բայց հրաժարական չի ներկայացնի: Այդ մասին հայտնի ձայնագրությունը տարածվեց շաբաթներ առաջ: Տարոն Մարգարյանի հրաժարականին անդրադառնալուց առաջ նշենք , սակայն, որ հանուն արդարության նա Երեւանի լավագույն քաղաքապետներից էր, որի պաշտոնավարման տարիներին ոչ միայն Երևան քաղաքը գեղեցկացավ, կանաչապատվեց, մայրաքաղաքին վերադարձվեց պուրակները և մի շարք տարիներով կուտակված հարցեր՝ աղբահանություն, շենքերի բարեկարգում, խաղահրապարակներ և այլն, լուծվեցին, այլ նաև ակտիվացան Երևան քաղաքի մշակութային կյանքը՝ ազգային տոնակատարությունների կազմակերպում եւ այլն, ակտիվացան միջազգային կապերը այլ մայրաքաղաքների ու քաղաքների հետ, փոխգործակցությունը առևտրատնտեսական, մշակույթի, առողջապահության, զբոսաշրջության և այլ ոլորտներում: Երևանի քաղաքապետարանը՝ Տարոն Մարգարյանի գլխավորությամբ, նաև մի շարք սոցիալական ծրագրեր էր իրականացնում, որոնք թեթևացնում էին բազմաթիվ ընտանիքների հոգսերը՝ աջակցություն երիտասարդ ընտանիքներին, զինվորներին, ուսանողներին, մշակութային գործիչներին և այլն: Որ Տարոն Մարգարյանը բարձր վարկանիշ ուներ, փաստում են բազմաթիվ սոցհարցումներ , վերջերս էլ նման հարցում իրականացրեց նոր իշխանությունը՝ արդյունքում պարզվեց, որ ՀՀԿ-ում ամենաբարձր վարկանիշը հենց քաղաքապետ Մարգարյանինն է, ինչը խոսում է այն մասին, որ նա թիմի շարքային անդամ չէ, այլ իր մարդկային կերպարի ու աշխատանքի արդյունքում սիրված ու ընդունելի քաղաքական գործիչ: Այս համատեքստում ազնիվ չէր նրա հրաժարականի դիմումը առանց բացատրության եւ պատճառաբանության, նա իր ընտրողների համար մութ թողեց հրաժարականի պատճառները՝ պաշտոնական հայտարարությամբ միայն ներողություն հայցելով ու շնորհակալություն հայտնելով: Պարզ չէ, թե հրաժարականը համաձայնեցված է եղել վարչապետ Նիկոլ Փաշինյանի հետ, թե ոչ: Հիշեցնենք, Փաշինյանը վարչապետ դառնալուց հետո հայտարարել էր, թե ինքը Մարգարյանին մեկ անգամ կհորդորի հրաժարական ներկայացնել, ու վերջինս կհետեւի այդ հորդորին, վարչապետը նաեւ ասել էր: Մարգարյանն էլ իր հերթին էր ասել, թե ճիշտ չէ, երբ իշխանության մի ճյուղը մյուսի վրա ճնշումներ է գործադրում: Սակայն Երեւանը ընտրությունների առումով Փաշինյանի համար ռազմավարական նշանակություն ունի, նա Հայաստանի կեսն է համարվում եւ գնալ ընտրությունների՝ մայրաքաղաքը թողնելով հակառակորդի վերահսկողության տակ, կնշանակի գնալ գիտակցված պարտության: Ուստիեւ Նիկոլ Փաշինյանն անցավ հոգեհարազատ մեթոդին՝ իրավական դաշտում Տարոն Մարգարյանի շուրջ սեղմելով օղակը:Վերջին ժամանակները տեղեկություններ կան, որ ԱԱԾ-ում եւ ոստիկանությունում քրեական գործեր են հարուցվել, որոնցում շրջանառվում է նաեւ նրա անունը: ԱԱԾ-ն զբաղվում է նաեւ Մարգարյանի ունեցվածքի օրինականությունն ուսումնասիրելով: Հետաքրքիրն այն է, ինչու Նիկոլ Փաշինյանի մտքով չի անցնում նման ուսումնասիրություն կատարել նաեւ իր կառավարության որոշ անդամների մոտ, հավատացնում ենք, ոչ պակաս տեսարժան բացահայտումներ կլինեն, որքան ՀՀԿ-ականների դեպքում: Հետաքրքիր է, Տարոն Մարգարյանի դեմ օպերացիան այսքանով կավարտվի, թե այնուամենայնիվ իրավապահները հրաժարականից հետո էլ նրան կպահեն ուշադրության ներքո: Անի Սահակյան
Հետևեք մեզ Viber-ում
