Փոխարինել ընտրական գրավը ստորագրահավաքով. ՀԴԿ-ի առաջարկները ԸՕ-ի վերաբերյալ
Հայաստանի դեմոկրատական կուսակցությունը (ՀԴԿ) հանդես է եկել Ընտրական օրենսգրքի փոփոխությունների վերաբերյալ առաջարկներով: Ինչպես հայտնում է ՀԴԿ-ի մամուլի ծառայությունը, կուսակցության առաջարկները հետեւյալն են. «Հաշվի առնելով, որ արտախորհրդարանական ուժերը դեռեւս չեն ներգրավվել Ընտրական օրենսգրքի փոփոխությունների վերաբերյալ քննարկումներին, Հայաստանի դեմոկրատական կուսակցությունը նպատակահարմար է գտնում այս փուլում հրապարակել մեր կարծիքով ամենաառանցքային մի քանի փոփոխություններ: Դրանք հետեւյալն են.
- Բացառել վարկանիշային ընտրակարգը եւ անցնել ընտրությունների ամբողջական համամասնական համակարգին:
- Բացառել ընտրություններին մասնակցության համար գրավադրման պայմանը, փոխարենը ներդնելով ստորագրահավաքի ինստիտուտը՝ 10000-15000 ստորագրությամբ: Ցանկացած կուսակցություն, որը գրանցված է Հայաստանի Հանրապետությունում համապատասխան կարգով, ազատորեն իրավունք պետք է ունենա մասնակցել ընտրություններին:
- Վստահված անձանց եւ դիտորդների իրավունքները պետք է հավասարեցված լինեն հանձնաժողովի անդամի իրավունքներին՝ բացառությամբ քվեարկության իրավունքը:
- Ընտրական հանձնաժողովները պետք է ձեւավորվեն բացառապես գործող իշխանության միջոցով եւ իրենք էլ կրեն դրանց գործունեության պատասխանատվությունը: Դրանք պետք է լինեն խիստ մասնագիտացված մարմիններ:
- Ընտրական հանձնաժողովի անդամը պետք է պետության կողմից գործուղվի համապատասխան ընտրատարածք պատահականության սկզբունքով՝ ընտրություններից 2 օր առաջ:
- Ընտրակաշառքը, դրա դրսեւորումը ցանկացած «փաթեթավորմամբ»` նվեր, բարեգործություն, տարատեսակ խնդրանքների բավարարում, պետք է քրեական օրենսգրքում ամրագրվի որպես պետական ծանր հանցագործություն:
- Կուսակցությունների համար համամասնական ցուցակով շեմը 5-%-ից պետք է իջեցնել 3%-ի, իսկ կուսակցությունների դաշինքի շեմը՝ 7%-ից 5%-ի»:
Հետևեք մեզ Viber-ում
