Պատրաստ եմ շաքարավազի իմ «զավոդը» տալ Փաշինյանին.Ս.Ալեքսանյան

Թող Նիկոլ Փաշինյանը գա համագործակցենք. թող գա ճակնդեղի բիզնեսը անի, մենք էլ ընդունենք գործարանը բազուկով աշխատեցնի, ԱԺ-ում լրագրողների հետ զրույցում նշել է ՀՀԿ խմբակցության պատգամավոր, գործարար Սամվել Ալեքսանյանը ՝ անդրադառնալով ՀԱԿ խմբակցության պատգամավոր  Նիկոլ Փաշինյանի պնդմանը, որ Սամվել Ալեքսանյանի ընկերությունը շաքարավազ է ներկրում հումքի անվան տակ, որպեսզի խուսափի հսկայական գումարի մաքսատուրքեր վճարելուց: Ինչ վերաբերում է շաքարավազի գործարանին, Ալեքսանյանն ասում  է. «Ճակընդեղի հետ կապված ես Փաշինյանին հրավիրում եմ, գումարը կա, ամեն ինչը կա, պրոստո մենք չեն հասցնում, թող գա էդ բիզնեսն էլ ինքը զարգացնի: Թող գա տիրություն անի: Մենք հումքը բերում ենք, հումքով ենք աշխատում, ես հաշիվներից խաբար չեմ, զանգեք «Ալեքս գրիգ», ձեզ կպատասխանեն: Նրա խոսքով, շաքարավազ արդեն 5-6 տարի չի ներկրում, միայն հումք է ներկրում: «Մեր շաքարի գործարանն աշխատում է տարեկան 4 ամիս, հիմա չի աշխատում: Ապրիլի կեսից մինչեւ մայիս կաշխատի: Ընդամենը 80 հազար տոննա շաքարավազ ենք արտադրում»,-ընդգծել է պատգամավորը: «Շաքարի գործարանը որ քանդվեց, այդ մասնագետները չէին կարող միանգամից շաքար ստանալ, դրա համար ժամանակ է պետք, դրան էլ ենք հասնելու»,- ասաց  Սամվել Ալեքսանյանը,իսկ հարցին՝ Դուք իսկապե՞ս տասյոթ դրամ եք վճարում գազի համար, պատգամավորը պատասխանեց, որ ինքը հիմա կոնկրետ չի կարող ասել՝ որքան: Լրագրողները հետաքրքրվեցին՝ կարո՞ղ են գնալ, տեսնել, թե Ս. Ալեքսանյանի շաքարի գործարանն ինչպես է աշխատում: Ի պատասխան՝ նա ասաց, որ լրագրողները երբ ուզում են, կարող են գնալ, միայն թե պետք է դեռ աշխատեցնեն գործարանը:   «Գրծարանը տարեկան 4 ամիս է աշխատում, քանի որ, եթե ամբողջ տարին աշխատի, ապա 2000-3000 տոննա շաքարավազ կարտադրի, իսկ մենք այդքան շուկա չունենք: Ֆինանսական դժվարություն չկա, մասնագետները պետք է բերվեն, 30 տարի այդտեղ բազուկ չի ցանվել, վեց տարվա մեջ մենք հազիվ մասնագետներին սովորեցրեցինք, որ բերած այդ հումքով կարողանան աշխատել: Դա այդպես հեշտ չէ, եթե այդքան հեշտ ա՝ թող մենք էդ զավոդը տանք Նիկոլ Փաշինյանին, գա-աշխատացնի, մենք ամեն ինչը կտանք, գումարն էլ, ամեն ինչն էլ»,- հայտարարեց Ս. Ալեքսանյանը: Ս. Ալեքսանյանը նաև ասաց, որ իրեն պատկանող Ախուրյանի շաքարավազի գործարանը տարեկան մոտ 80 տոննա արտադրանք է տալիս: Ա.Ավագյան