Հայաստան-ԵՄ համաձայնագրի վավերացման գործընթացը լրացուցիչ թափ է ստանում. Աշոտյան
«Այս պահի դրությամբ, իմ տեղեկացմամբ, Հայաստան-ԵՄ համաձայնագրի վավերացման որեւէ խոչընդոտ չունենք եվրոպական երկրներում: Մենք խոչընդոտներ չունեինք իշխանափոխությունից առաջ, իսկ իշխանափոխությունից հետո վավերացման գործընթացը կարող է լրացուցիչ թափ ստանալ քաղաքական օրակարգում վերադասավորումների հետեւանքով եւ Հայաստանի նկատմամբ առավել մեծ ուշադրության մակարդակով: Կարծում ենք, որ դիվանագիտական բոլոր ջանքերը, թե ԱԳՆ-ի, թե ԱԺ-ի, պետք է մեկտեղել վավերացման գործընթացի արագացումն ապահովելու համար»,-ԱԺ-ում լրագրողների հետ հանդիպման ժամանակ նշեց Եվրանեսթ խորհրդարանական վեհաժողովում հայկական պատվիրակության ղեկավար, ԱԺ արտաքին հարաբերությունների հանձնաժողովի նախագահ Արմեն Աշոտյանը: «Շատ եվրոպական երկրներում վավերացումը բյուրոկրատական գործընթաց է: Օրինակ, շատ բարդ գործընթաց է նման միջազգային պայմանագրերի վավերացումը Գերմանիայում, որովհետեւ գերմանական օրենսդրությամբ գերմանական բոլոր ֆեդերալ նահանգների խորհրդարանները պետք է իրենց համաձայնությունը տան: Իհարկե, մենք դիմել ենք մեր գերմանացի գործընկերներին, էլի ենք դիմելու, որ արագացնեն այս համաձայնագրի վավերացումը, տանեն հրատապ ռջեժիմով: Նույն գործընթացը կա նաեւ Իսպանիայում, Բելգիայում: Վերջինս եւս ունիտար պետություն չէ: Վավերացումը ժամանակատար է, ծախսատար է, բայց դա պետք է փորձենք արագացնել միասին: Այս հարցում մեր հարվածային ուժը Արտաքին գործերի նախարարությունն է, բուն աշխատանքն անում են տեղերում դեսպանները, այս օրերին մի շարք վավերացումներ տեղի ունեցան և, փաստորեն, մեր դեսպանները լավ են աշխատել:Բալթյան երկրներից Հայաստան-ԵՄ համաձայնագիրն արդեն վավերացրել են Լեհաստանի, Լյուքսեմբուրգի, Ռումինիայի ու Բուլղարիայի խորհրդարանները»,-ընդգծեց Աշոտյանը:
Հետևեք մեզ Viber-ում
