Էլ ուրիշ դարդ չունեինք, մնացել էր՝ «Բատկան» Ղարաբաղի հարցով զբաղվի
Երեկ բելառուսական լրատվամիջոցները ուշագրավ տեղեկություն հաղորդվեցին: Պարզվում է Բելառուսի արտգործնախարար Վլադիմիր Մակեյը հունիսի 27-ին հանդիպել է ԵԱՀԿ Մինսկի խմբի համանախագահներ Ստեֆան Վիսկոնտիի (Ֆրանսիա), Իգոր Պոպովի (Ռուսաստան) և Էնդրյու Շոֆերի (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ: Ըստ բելառուսական «ԲԵԼՏԱ» գործակալության, որը վկայակոչել է ԱԳՆ պաշտոնական հաղորդագրությունը, ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչը նախարարին տեղեկացրել են հայ-ադրբեջանական շփման գծում տիրող իրավիճակի և ԼՂ կարգավորման հարցում գործադրվող ջանքերի մասին: Իսկ հիմա ամենահետաքրքրականը՝ վերոնշյալ հանդիպման ընթացքում քննարկվել են ԵԱՀԿ Մինսկի խմբի գործունեության արդի հարցեր, ինչպես նաև Բելառուսի հնարավոր ներգրավվածությունը հակամարտության կարգավորման գործում: Նախ, ինքը՝ ԵԱՀԿ Մինսկի խմբի համանախագահների հանդիպման փաստն արդեն իսկ զարմանալի է: Բելառուսը մի երկիր է, որն ակտիվորեն զինում է Ադրբեջանին: Բոլորովին վերջերս Ադրբեջանը ցուցադրեց բելառուսական սպառազինությունը: Այդ որ օրվանից Բելառուսը, որը Հայաստանի դաշնակիցն է մի շարք կազմակերպություններում՝ ԵԱՏՄ-ում ու ՀԱՊԿ-ում, Հայաստանի հակառակորդի զինելով Արցախի ու Հայաստանի դեմ՝ ղարաբաղյան խաղաղ կարգավորման կողմնակից դարձավ: Ռուսաստանը, որպես ԵԱՀԿ Մինսկի խմբի համանախագահող պետություն՝ նույն քաղաքականություն է վարում. Մասնակցում է խաղաղ բանակցություններին՝ ԵԱՀԿ Մինսկի խմբի համանախագահության ձևաչափում, ապա զինում է Բաքվին: Հիմա էլ Բելառո՞ւսն է նույն քայլին ցանկանում հասնել: Ադրբեջանը Բելառուսից վերջերս ձեռք է բերել «Պոլոնեզ» համազարկային կրակի ռեակտիվ համակարգեր, այդ ինչ «երեսով» է «Բատկան» քննարկում Բելառուսի հնարավոր ներգրավվածությունը ղարաբաղյան հակամարտության կարգավորման գործում: Հայաստանին ու Արցախին պե՞տք են նման դաշնակիցներ, առավելևս՝ կարգավորմամբ զբաղվող միջնորդներ, որոնք Ալիևին են զինում և նրա շահերն են պաշտպանում: Թամար Բագրատունի
Հետևեք մեզ Viber-ում
