Արմեն Սարգսյանի խորամանկ քայլը Նիկոլ Փաշինյանի հանդեպ
Վարչապետ Նիկոլ Փաշինյանի եւ նախագահ Արմեն Սարգսյանի միջեւ հասունացող հակասությունների մասին խոսակցություններին զուգահեռ վերջինս հետաքրքրական պահված է դրսեւորում: Նախագահ Արմեն Սարգսյանը, ԱՄՆ Սենատում մասնակցելով Հայաստանի առաջին հանրապետության 100-ամյակի առիթով հանդիսավոր արարողությանը, անդրադարձել է նաեւ Հայաստանի թավշյա հեղափոխությանն ու նոր Հայաստանին, ասելով, որ հատուկ հարգանք պետք է տածել փողոցներ դուրս եկած ցուցարարների եւ նրանց առաջնորդ, վարչապետ Նիկոլ Փաշինյանի նկատմամբ. «Մենք պետք է հպարտ լինենք, որ կարող ենք աշխարհին օրինակ ծառայել: Հատուկ հարգանք է պետք մատուցել նրանց, ովքեր Հայաստանի փողոցներում էին հավաքվել՝ առաջին հերթին ցուցարարներին և պարոն Փաշինյանին»,- մասնավորապես ասել է Արմեն Սարգսյանը:Հայաստանի նախագահի այդ հայտարարությունն արժանացել է արարողությանը ներկաների ծափերին: Վարչապետի եւ նախագահի միջեւ հակասությունների առիթը ըստ վարկածների լիազորությունների սահմանազանցության եւ ըստ այդմ շահերի բախման վերաբերյալ է, օրինակ այն, որ Արմեն Սարգսյանը վարչապետին չի զեկուցում իր արտասահմանյան այցերի մասին, մինչդեռ Սահմանադրության պահանջն է, որ նախագահն իր արտասահմանյան այցերը պետք է համաձայնեցնի վարչապետի հետ: Հասկանալի է, որ Սերժ Սարգսյանի անկումից հետո Արմեն Սարգսյանը որոշել է ազատվել մարիոնետի իր կարգավիճակից, հենց այդ առաքելությամբ էր ՀՀԿ ղեկավարը նրան բերել Հայաստան, որպեսզի ներկայացուցչական խնդիր լուծեր: Օգտվելով իրավիճակից՝ Արմեն Սարգսյանը ըստ էության ցանկանում է ինքնուրույն ֆիգուրի տպավորություն թողնել, սակայն նրա դիվանագիտական ունակությունները թույլ են տալիս կշռադատելու, որ եթե գործնականում նա կարող է իրեն նման անկախություն թույլ տալ, ապա արտաքուստ հակադրվել ժողովրդական հեղափոխության արդյունքում գործադիր իշխանություն ձեւավորած Նիկոլ Փաշինյանին, կարող է չներվել հեղափոխական զանգվածների կողմից: Այդ պատճառով էլ նա ուշագրավ ռեւերանս է արել Փաշինյանի նկատմամբ՝ վերջինիս արարքը: Կարծիքներ են հնչում, թե Նիկոլ Փաշինյանը Արմեն Սարգսյանի դեմ հզոր կոմպրոմատ ունի՝ ի դեմս մշտական բնակության մասին տեղեկանքի, որը միայն Փաշինյանն է իբր տեսել, սակայն հանրային պահանջին հակառակ Արմեն Սարգսյանն այդպես էլ դա հրապարակային չդարձրեց: Սակայն կարող ենք համարել, որ դա չգործող կոմպրոմատ է, եթե Փաշինյանը ինչ-որ պահից պետք է հայտարարի այդ փաստաթղթի կեղծ լինելու կամ չգոյության մասին, ապա <<իմանալ, թաքցնելու>> մեղադրանքով կվարկաբեկվի ավելի շատ, քան Արմեն Սարգսյանը: ւ ուրեմն Արմեն Սարգսյանը ԱՄՆ-ում դրսեւորած իր պահվածքով ընդամենը մեկ նպատակ է հետապնդել՝ օգտվել Նիկոլ Փաշինյանի բարձր վարկանիշից եւ վերջինիս գովերգելով հայտնվել նույն հարթության մեջ, միեւնույն ժամանակ ձերբազատվել Սերժ Սարգսյանի <<մարդու>> պիտակից, մինչեւ ջրերը կզուլալվեն եւ ամեն բան իր տեղը կընկնի: Ով ով, Արմեն Սարգսյանի պես հմուտ դիվանագետը նույնպես հասկանում է, որ հնարավոր չէ պետությունը պահել միայն տեսարաններով, եթե չկա <<հացը>>, ապա տեսարանները շատ կարճ ժամանակում ձանձրալի են դառնում: Ասել կուզի, միայն ԱԱԾ-ի մասկի շոուներով անհնար է երկարատեւ հեղինակություն պահպանել, մանավանդ, որ հեղափոխական փոփոխություններ էլ չեն կատարվում ոչ արտաքին վեկտորի, ոչ ներքին հարցերում:Եթե արտաքին քաղաքական կուրսը պահպանվում է, ուրեմն տնտեսական մեծ ռեֆորմներով պետք է գտնել փողի աղբյուրը, իսկ ներկա թիմով վարչապետն անգամ բարդ երկրաչափական խնդիր չի կարող լուծել, ուր մնաց ռեֆորմ իրականացնի: Այս իրողությունում ակնկալել, որ արտերկրի մեր հայրենակիցները ներդրումներ կբերեն Հայաստան, նույնպես միամտություն է: ԱԱԾ-ի արշավը անկախ ամեն ինչից անկայունության մթնոլորտ է երկրում ձեւավորել: Անի Սահակյան
Հետևեք մեզ Viber-ում
