Նիկոլ Փաշինյանը՝ գլխավոր դատախազի հնարավոր հրաժարականի մասին

Լրագրողների հետ զրույցում այսօր վարչապետ Նիկոլ Փաշինյանը, պատասխանել է նաև ՀՀ գլխավոր դատախազ Արթուր Դավթյանի հնարավոր հրաժարականի մասին հարցին: Ինչպես ասել է՝ ինքն այդ հարցի վերաբերյալ չի կարող որևէ կարծիք հայտնել, քանի որ իրավասություն չունի: «Ես քաղաքական գնահատական տալու անհրաժեշտություն այս պահին չեմ տեսնում, որովհետև կարծում եմ՝ դատախազական համակարգը պետք է լիարժեք իր գործառույթը իրականացնելու հնարավորություն ունենա: Եթե ձեր ասած սկզբունքով առաջնորդվենք, դատախազության յուրաքանչյուր աշխատողի, պետական կառույցի յուրաքանչյուր աշխատողի մասին կարելի է ասել: Մենք վենդետայի տրամաբանությամբ չենք առաջնորդվելու: Մեր խնդիրն է՝ ապահովել հանրային համերաշխությունը, և ես հույս ունեմ, որ դատախազությունը կգնա այդ ճանապարհով: Ես քայլեր եմ տեսնում այդ ուղղությամբ և հույս ունեմ՝ այդ քայլերը համոզիչ կլինեն թե՛ իրավունքի, թե՛ օրենքի, թե՛ հանրային կարծիքի տեսակետից»,- պարզաբանել է նա՝ հավելելով, որ դատախազությունը պետք է լինի իրավունքը, օրենքը, մարդու իրավունքներն ու պետական շահերը պաշտպանող մարմին: