«Սուրբ Աստվածամայր» ԲԿ-ում 5 ամսական երեխա է մահացել

Երեւանի «Սուրբ Աստվածամայր» ԲԿ-ում էնտերովիրուսային վարակի հետեւանքով 5 ամսական երեխա է մահացել։ Այս մասին հայտնում է ՀՀ առողջապահության նախարարությունը։ Երեխան վերակենդանացման բաժանմունք էր ընդունվել հունիսի 26-ին, բժիշկներին չի հաջողվել փրկել նրա կյանքը։ Արձագանքելով հանրության շրջանում տարածված խուճապային լուրերին` առողջապահության նախարարությունը հայտնում է, որ Հայաստանում էնտերովիրուսային վարակների համաճարակ չկա, բայց կա աշխուժացման միտում։ Նախարարությունը հոսպիտալացված երեխաների շրջանում ինտենսիվ լաբորատոր հետազոտություններ է իրականացնում`պարզելու հանրապետությունում էնտերովիրուսային վարակների տարածման աստիճանը։ Մասնագետները հորդորում են ծնողներին ուշադիր լինել երեխաների մոտ հնարավոր ախտանշանների` ջերմության, թուլության, ուժեղ գլխացավի, որովայնի ցավերի, սրտխառնոցի, փսխման, քրտնարտադրության ու դողի նկատմամբ, դրանց ի հայտ գալու դեպքում խուսափել ինքնաբուժումից ու անմիջապես դիմել մասնագետներին: Էնտերովիրուսային վարակները սուր ինֆեկցիոն հիվանդություններ են, որոնք փոխանցվում են օդակաթիլային, կոնտակտ-կենցաղային ճանապարհով, ինչպես նաեւ սննդի միջոցով։ Էնտերովիրուսը կարող է ախտահարել սիրտը, թոքերը, լյարդը եւ ենթաստամոքսային գեղձը։ Ամենածանր բարդությունը համարվում է մենինգիտը՝ ուղեղի թաղանթի բորբոքումը։ Առողջական քրոնիկ խնդիրներ ունեցողների մոտ հիվանդության բարդացումը կարող է հանգեցնել մահվան։ Առողջապահության նախարարությունը տեղեկացնում է՝ էնտերովիրուսային վարակներից պաշտպանվելու համար անհրաժեշտ է պահպանել անձնական հիգիենայի կանոնները` հաճախակի լվանալ ձեռքերը, լավ լվանալ միրգը եւ բանջարեղենը, խուսափել վարակակիրների հետ շփումից, հաճախակի օդափոխել եւ մաքրել բնակարանը։ Էնտերովիրուսի ամենաբարձր տարածվածությունը Հայաստանում եղել է 2014 թվականին, երբ գրանցվել էր մենինգիտի 807 դեպք: Առողջապահության նախարարության դիտարկումները շարունակվում են՝ հոսպիտալացված երեխաների շրջանում ինտենսիվ լաբորատոր հետազոտությունների միջոցով պարզելու հանրապետությունում էնտերովիրուսային վարակների աշխուժացման միտումը: Նախնական արդյունքներով՝ վիրուսի հատուկենտ դեպքեր, ինչը նշանակում է, որ համաճարակային վիճակի մասին խոսք գնալ չի կարող: Բայց կարող է աշխուժացման միտում լինել; Սակայն, ելնելով այս վիրուսի համաճարակաբանական առանձնահատկություններից, նախարարությունը հորդորում է ծնողներին՝ ուշադրության առնել երեխաների մոտ հետեւյալ ախտանշանների առկայությունը՝ ջերմության ալիքաձեւ բարձրացում, թուլություն, ուժեղ գլխացավ, լորձաթաղանթի բորբոքում, որովայնում ցավեր, սրտխառնոց, փսխում, քրտնարտադրություն, դող: Էնտերովիրուսային վարակները կարող են արտահայտվել նաեւ մրսածության ախտանշաններով: Եղանակային ներկա պայմաններում, երբ դիտվում է նաեւ աղիքային վարակների, այդ թվում եւ դիզենտերիայի ակտիվացում, հարկ է թվարկված ախտանշանների դեպքում խուսափել ինքնաբուժումից, դիմել մասնագետների: Չափազանց կարեւոր է խուսափել ջրազրկումից: Վիճակագրության համաձայն՝ 2014 թվականի մարտ-հոկտեմբերին Հայաստանում գրանցվել է էնտերովիրուսով պայմանավորված շճային մենինգիտի 807 դեպք: Էնտերովիրուսը կարող է ախտահարել սիրտը, թոքամիզը, լյարդը եւ ենթաստամոքսային գեղձը՝ առաջացնելով միոկարդիտ, պերիկարդիտ, պլեւրիտ, հեպատիտ, ենթաստամոքսային գեղձի բորբոքում՝ ծանր դեպքերում հանգեցնելով ընդհուպ մինչեւ մահվան դեպքերի: Հիվանդանում են հիմնականում մինչեւ 10 տարեկան երեխաները, հիվանդությունն ընթանում է կլինիկորեն ծանր եւ միջին ծանրության ընթացքով, առավել ծանր՝ մինչեւ 1 տարեկանների մոտ, ցավոք, առողջական քրոնիկ խնդիրներ ունեցողների մոտ որոշ դեպքերում անբարեհաջող ելքով: Հայաստանում վերջին նման դրսեւորումը հունիսի 26-ին «Սուրբ Աստվածամայր» ԲԿ-ի վերակենդանացման բաժանմունք ընդունված 5 ամսական երեխայի մահվան դեպքն է: Էնտերովիրուսային վարակների փոխանցումն իրականացվում է կղանքաբերանային մեխանիզմներով (ջրային, սննդային, կենցաղ-կոնտակտային) եւ աէրոզոլային (օդակաթիլային եւ փոշու միջոցով): Յուրաքանչյուր ոք կարող է վարակվել էնտերովիրուսներով՝ հիվանդ մարդու կամ նրա կողմից օգտագործված իրերի, առարկաների կամ մակերեսների հետ սերտ շփման արդյունքում: Առողջապահության նախարարությունը տեղեկացնում է՝ էնտերովիրուսային վարակներից պաշտպանվելու համար անհրաժեշտ է`

• պահպանել անձնական հիգիենայի կանոնները (հաճախակի լվանալ ձեռքերը, հազի եւ փռշտալու հիգիենան), հատկապես նորածինների խնամքի պարագայում,
• միրգը եւ բանջարեղենը լավ լվանալ,
• խուսափել էնտերովիրուսային վարակներով հիվանդների հետ սերտ շփումից,
• բնակարանը հաճախակի օդափոխել եւ խոնավ մաքրել։