«Այսօր նա ինձ համար հերոս չէ, մինչև այդ էլ հերոս չէր». Մոնթե Մելքոնյանի կինը՝ Մանվել Գրիգորյանի մասին
«Այն Սերժ Սարգսյանը, որին ճանաչում էի, նույնը չէր, որի հրաժարականը պահանջեց ժողովուրդը: Ես իրեն լավ էի վերաբերվում արցախյան շարժման օրերին՝ համեստ էր. իրեն տեսել եմ տարբեր վայրերում՝ Մարտունիում, դիրքերում: Պաշտպանության նախարար եղած ժամանակ հանդիպել եմ, նախագահական տարիներին՝ ոչ: Եթե հանդիպեի, կասեի՝ ժողովրդի սոցիալական վիճակը պետք է առաջին հերթին բարելավել, բարորության մասին հոգալ...»,- «Ազատության» եթերում պատասխանելով օգտատերերի հարցերին՝ ասել է Սեդա Մելքոնյանը՝ Մոնթե Մելքոնյանի կինն ու հավելել, որ միշտ էլ հավատացել է հայ ժողովրդի ուժին, որի արդյունքը հեղափոխությունն էր: Խոսելով նոր կառավարութան մասին՝ Սեդան գնահատել է դրական փոփոխություններն ու վստահություն հայտնել, որ Հայաստանը ճիշտ ուղու վրա է: Անդրադառնալով գեներալ Մանվել Գրիգորյանի հետ կապված ԱԱԾ սկանդալային բացահայտումներին՝ Սեդա Մելքոնյանն ասել է. «Առաջին զգացողությունը, որ ունեցա՝ զայրույթ, աններելիություն... բաներ կան, որ պետք չէ խախտել, այդ տեսակ վերաբերմունքն անհարիր է հերոսին: Այսօր նա ինձ համար հերոս չէ, մինչև այդ էլ հերոս չէր»:
Հետևեք մեզ Viber-ում
