Խոշոր ավտովթար Գորիսում. 23-ամյա վարորդը մոտ 5 մետր ընկել է կամրջից

Այսօր՝ հունիսի 24-ին, խոշոր ավտովթար է տեղի ունեցել Սյունիքի մարզում: Ժամը 16:20-ի սահմաններում Գորիս քաղաքի բնակիչ, 23-ամյա Գագիկ Միրզաթունյանը իր վարած ՎԱԶ-2121 մակնիշի 10 ՕQ 002 համարանիշի ավտոմեքենայով Գորիսի Արցախյան խճուղու փողոցում՝ կամրջի վրա, դուրս է եկել ճանապարհի երթևեկելի գոտուց, բախվել կամրջի մետաղյա արգելապատնեշին, կոտրել այն և մոտ 5 մետր բարձրությունից ընկել կարմջի տակ: Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդը մարմնական վնասվածքներով տեղափոխվել է Գորիսի բժշկական կենտրոն: Նրան առաջինը օգնության են հասել քաղաքացիներն ու Արտակարգ իրավիճակների նախարարության Փրկարար-ծառայության Գորիսի հրշեջ-փրկարարները: Դեպքի վայր են ժամանել Ճանապարհային ոստիկանության 2-րդ սպայական գումարտակի 6-րդ վաշտի ծառայողները՝ վաշտի հրամանատար Գեղամ Մարգարյանի գլխավորությամբ: Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է ոստիկանության Գորիսի բաժին, որտեղից ժամանել է օպերատիվ խումբը: Փաստի առթիվ ՃՈ 2-րդ սպայական գումարտակի 6-րդ վաշտի ավագ հետաքննիչ Սուրեն Վարդանյանի կողմից նյութեր են նախապատրաստվում: Ֆոտոլրագրողը հայտնում է, որ բախման հետևանքով վնասվել են նաև կամրջի վրա տեղադրված պլաստմասե ծաղկամանները: Լուսանկարները՝ Սուրեն Խաչատրյանի Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: